बैंकिङ्ग समाचार, काठमाडौं ।
नेपाल पुनर्बीमा कम्पनी लिमिटेडले चालू आर्थिक वर्षको दोस्रो त्रैमासिक वित्तीय विवरण बल्ल आज जेठ २३ गते मंगलवार सार्वजनिक गरेको छ । कम्पनीले गत पुस मसान्तसम्मको वित्तिय विवरण आजव प्रकाशित गरेको हो ।

विवरणअनुसार चालू आवको दोस्रो त्रैमाससम्म कम्पनीले कम्पनीले निर्जीवन व्यवसायबाट रू. ४६ करोड ४५ लाख नाफा कमाएको छ भने जीवन बीमा व्यवसायबाट रू. १७ करोड २० लाख नोक्सानी व्यहोरेको छ । दोस्रो त्रैमासमा कम्पनीले कूल २९ करोड २४ लाख ६७ हजार रुपैयाँ खुद नाफा गरेको हो ।

गत वर्षको सोही अवधिमा कम्पनीले निर्जीवन बीमा व्यवसायबाट ३३ करोड ६१ लाख रुपैयाँ नाफा गरेको थियो भने जीवन बीमा व्यवसायमा ४ करोड ४७ लाख रुपैयाँ नोक्सानीमा थियो ।

कम्पनीको निर्जीवन बीमा ब्यवसायबाट हुने नाफा गत आवको तुलनामा चालू आवमा ३८ दशमलव १८ प्रतिशत वृद्धि भएको हो । निर्जीवन बीमा व्यवसायबाट कम्पनीले रू. १ अर्ब ४२ करोडभन्दा बढी आम्दानी गर्न सफल भएकाले नाफा बढेको हो । त्यस्तै जीवन बीमा व्यवसायको आम्दानी भने रू. १६ करोड ३ लाख ऋणात्मक रहेको छ । 

चालू आवको दोस्रो त्रैमाससम्म कम्पनीको निर्जीवन र जीवन बीमा दुवै व्यवसायतर्फको व्यवस्थापन खर्च बढेको छ । चालू आवमा निर्जीवनतर्फ रू. ५ करोड ६२ लाख र जीवनतर्फ रू. १ करोड ८६ लाख व्यवस्थापन खर्च भएको छ । गत आवमा यस्तो खर्च क्रमशः रू. ५ करोड र रू. ८१ लाख ७७ हजार थियो ।

चालू आवमा निर्जीवन बीमा व्यवसायतर्फको जगेडा कोषमा रू. ५ अर्ब ८९ करोड र जीवन बीमा व्यवसायमा रू. २८ करोड ७६ लाख सञ्चिति गरेको छ । त्यस्तै बीमा कोषमा निर्जीवन व्यवसायको रू. २ अर्ब ५१ करोड रहेको छ । 

चालू आवको दोस्रो त्रैमाससम्म कम्पनीले कुल रू. ३ अर्ब १० करोडभन्दा बढी बीमा शुल्क आर्जन गरेको छ । यो बीमा शुल्क गत आवको दोस्रो त्रैमासमा रू. ५ अर्ब ५८ करोड थियो । त्यस्तै कम्पनीले रू. २ अर्ब ९१ करोड दाबी भुक्तानी गरेको छ भने रू. १ अर्ब ३८ करोडभन्दा बढी दाबी भुक्तानी गर्न बाँकी रहेको छ । प्रतिशेयर आम्दानी रू. २ दशमलव ५१ (वार्षिकीकरण) र प्रतिशेयर नेटवर्थ रू. १७४ दशमलव ६४ छ ।