बैंकिङ्ग समाचार, काठमाडौं ।
जाल्पा सामुदायिक लघुवित्त वित्तीय संस्था लिमिटेडले गत आर्थिक वर्षको चौथो त्रैमाससम्म ९ करोड ८६ लाख रूपैयाँभन्दा बढी खुद नाफा गरेको छ । कम्पनीले अघिल्लो वर्षको सोही अवधिको तुलनामा ४ दशमलव ६७ प्रतिशत कम खुद नाफा गरेको हो ।

अघिल्लो वर्ष सो अवधिसम्म कम्पनीले १० करोड ३४ लाख रूपैयाँभन्दा बढी खुद नाफा गरेको थियो । गत वर्ष खराब कर्जा संकलनमा कमि आउँदा कम्पनीको खुद नाफा घटेको देखिन्छ । अघिल्लो वर्ष ६ करोड ९८ लाख रूपैयाँभन्दा बढी खराब कर्जा संकलन गरेको कम्पनीले गत वर्ष ३ करोड ८४ लाख रूपैयाँभन्दा बढी मात्र यो कर्जा संकलन गरेको देखिन्छ ।

खुद ब्याज आम्दानी बढेपनि सञ्चालन खर्च, कर्मचारी खर्च बढेपछि र खराब कर्जा संकलनमा कमि आउँदा कम्पनीको खुद नाफा घटेको देखिन्छ । कम्पनीको सञ्चालन नाफा पनि अघिल्लो वर्षभन्दा १ दशमलव ४५ प्रतिशत कम ९ करोड ४६ लाख रूपैयाँभन्दा बढी मात्र भएको छ । हाल कम्पनीको चुक्तापूँजी १६ करोड रूपैयाँ रहेको छ भने जगेडा कोष रकम ४७ करोड २६ लाख रूपैयाँभन्दा बढी छ ।

विभिन्न बैंक तथा वित्तीय संस्थाबाट ५७ दशमलव ८९ प्रतिशत बढी १ अर्ब ८९ करोड रूपैयाँ कर्जा सापटी लिएको कम्पनीले ४० दशमलव २९ प्रतिशत बढी ५ अर्ब ५ करोड रूपैयाँ कर्जा प्रवाह गरेको छ । 

यस अवधिसम्म कम्पनीको निक्षेप संकलन भने साढे २० प्रतिशत बढी २ अर्ब ५५ करोड रूपैयाँ भएको छ । निष्क्रिय कर्जा ३ दशमलव १४ प्रतिशत अघिल्लो वर्ष रहेकोमा गत वर्ष घटेर २ दशमलव ३२ प्रतिशतमा झरेको छ । कम्पनीको प्रतिशेयर आम्दानी ६१ रूपैयाँ ६६ पैसा र प्रतिशेयर नेटवर्थ ३४७ रूपैयाँ ७० पैसा रहेको छ ।