बैंकिङ्ग समाचार, काठमाडौं ।
समता लघुवित्त वित्तिय संस्था र घरेलु लघुवित्त वित्तिय संस्था गाभिएर बनेको समता घरेलु लघुवित्त वित्तिय संस्थाले नयाँ निष्काशन (एफपिओ) गर्ने प्रक्रिया अगाडि बढाएको छ । सर्वसाधारणमा एफपिओ जारी गर्नको लागि कम्पनीले आरविवि मर्चेन्ट बैकिङ्ग लिमिटेडलाई निष्काशन तथा बिक्री प्रबन्धक नियुक्त गरेको छ ।

समता र घरेलु लघुवित्त १००ः८० (समता:घरेलु) कायम हुने गरि गाभिएका थिए । दुईसंस्था गाभिए पश्चात् बनेको संस्थाको कुल चुक्ता पूँजी २८ करोड ५६ लाख २० हजार १६० रुपैयाँ पुगेको थियो । जसमा कम्पनीले २० प्रतिशत वोनस शेयर वितरण गरेपछि चुक्ता पूँजी ३४ करोड २७ लाख ४४ हजार १९२ रुपैयाँ कायम भएको छ।

बोनस पछि कायम चुक्ता पूँजीमा शेयर संरचना ७०ः३० (संस्थापक:सर्वसाधारण) कायम हुने गरि २ करोड ८९ लाख ४४ हजार रुपैयाँ बराबरको २ लाख ८९ हजार ४४० कित्ता एफपिओ सर्वसाधारणमा जारी गर्ने भएको हो ।

जसका लागि निष्काशन तथा बिक्री प्रबन्धकमा आरविवि मर्चेन्ट बैकिङ्ग लिमिटेडलाई नियुक्त गरेको छ । सो सम्झौतापत्रमा समता घरेलु लघुवित्त वित्तिय संस्था लिमिटेडको तर्फबाट प्रमुख कार्यकारी अधिकृत डा. मदन घिमिरे र आरविवि मर्चेन्ट बैंकिङ्ग लिमिटेडको तर्फबाट प्रमुख कार्यकारी अधिकृत बद्री प्रसाद प्याकुरेलले हस्ताक्षर गरे ।