बैंकिङ्ग समाचार, काठमाडौं ।
चालु आर्थिक वर्ष २०८०/८१ को पहिलो महिना साउनमा राष्ट्रिय स्तरका विकास बैंकहरुले ८४ करोड बढी खुद नाफा कमाएका छन् । नेपाल राष्ट्र बैंकका अनुसार चालु आवको पहिलो महिनामा राष्ट्रिय स्तरका ८ विकास बैंकहरुले कुल ८४ करोड २१ लाख ९० हजार रुपैयाँ खुद नाफा कमाएका हुन् ।

साउन महिनामा सर्वाधिक नाफा कमाउने सूचीको पहिलो नम्बरमा गरिमा विकास बैंक रहेको छ । गरिमाले साउनमा २४ करोड ९५ लाख रुपैयाँ नाफा कमाएको छ भने गरिमालाई पछ्याउदै दोस्रो धेरै नाफा कमाउनेमा मुक्तिनाथ विकास बैंक रहेको छ । मुक्तिनाथ विकास बैंकले १६ करोड ८० लाख रुपैयाँ नाफा आर्जन गरेको छ । 

त्यसैगरी, कामना विकास बैंक, लुम्बिनी विकास बैंक र महालक्ष्मी विकास बैंक क्रमशः तेस्रो, चौथो र पाँचौ स्थानमा छन् । यी विकास बैंकहरुले क्रमशः ८ करोड १३ लाख, ७ करोड ९१ लाख र ७ करोड ८५ लाख रुपैयाँ खुद नाफा आर्जन गरेका छन् ।

यस्तै, शाइन रेसुङ्गा विकास बैंकले ७ करोड १९ लाख २० हजार, सांग्रिला विकास बैंकले ५ करोड ६५ लाख २० हजार रुपैयाँ र ज्योती विकास बैंकले ५ करोड ७० लाख ९० हजार रुपैयाँ नाफा आर्जन गरेका छन् ।