काठमाडौं – सन् २०२३ मा बैंक तथा वित्तीय संस्थाबाट भएका शंकास्पद कारोबार तथा गतिविधिमा सबैभन्दा धेरै सम्पति शुद्धीकरणका लागि गरिएकाे देखिएकाे छ। सोमबार नेपाल राष्ट्र बैंकको वित्तीय इकाइले सार्वजनिक गरेको एक प्रतिवेदनमा सबैभन्दा धेरै सम्पति शद्धीकरणका लागि गरिएको कारोबार देखिएको हो।

प्रतिवेदनअनुसार सन् २०२३ मा भएका ६ हजार २ सय ५५ वटा शंकास्पद आर्थिक कारोबार तथा गतिविधिमा सम्पति शद्धीकरणका लागि ३ हजार १९९ वटा कारोबार भएको देखिन्छ। यो संख्या प्रतिवेदनमा उल्लेख शंकास्पद कारोबार तथा गतिविधिमध्ये सबैभन्दा धेरै हो।

यसैगरी, समीक्षा अवधिमा कर छली गर्न १ हजार आठ सय ६८ वटा कारोबार भएको छ। त्यसपछि मुद्रा, बैंकिङ्ग, विदेशी मुद्रा सटहीजस्ता कारोबार रहेका छन् । जसअन्तर्गत १ हजार ४० वटा कारोबार शंकास्पद भएको इकाइद्वारा सार्वजनिक प्रतिवेदनमा उल्लेख छ।

यसैगरी , सो अवधिमा ठगीका लागि ५ सय ६५, क्यासिनो तथा गेमिङका लागि ४ सय ५ , कम्पनी तथा एशोसिएसनका लागि २ सय ८८, शिक्षा, स्वास्थ्य तथा वैदेशिक रोजगारका लागि ७०, भ्रष्टाचारका लागि ४७, जालसाजीका लागि २६, घरजग्गा कारोबारका लागि २०, नागरिकता, अध्यागमन तथा पासपोर्टका लागि १८, मानव बेचबेखिनका लागि १४, तस्करका लागि १४, इन्साइडर ट्रेडिङका लागि १३ र नक्कली मुद्राका लागि ११ वटा शंकास्पद कारोबार भएको प्रतिवेदनमा उल्लेख छ।