डीडीसीको विराटनगर दुग्ध वितरण आयोजनाका प्रमुख नवीनकिशोर शर्मा पक्राउ 


काठमाडौं – दुग्ध विकास संस्थान (डीडीसी) मा भएको भनिएको आर्थिक अनियमितता तथा संगठित अपराधसम्बन्धी कसूरको अनुसन्धानका क्रममा विराटनगर दुग्ध वितरण आयोजनाका प्रमुख नवीनकिशोर शर्मा पक्राउ परेका छन्। प्रहरीका अनुसार संस्थानका तत्कालीन महाप्रबन्धक तथा उच्च तहका कर्मचारीहरूको मिलेमतोमा गैरकानुनी आर्थिक लाभ लिई संस्थानलाई ठूलो आर्थिक क्षति पुर्‍याइएको भन्ने उजुरीका आधारमा अनुसन्धान अघि बढाइएको हो।

प्रारम्भिक अनुसन्धानबाट तत्कालीन महाप्रबन्धक, प्रशासनिक तहका अधिकारी, चिस्यान केन्द्रका प्रमुख तथा अन्य कर्मचारीहरूको पूर्वयोजना र मिलेमतोमा विभिन्न समूह तथा सञ्जाल खडा गरी संस्थानलाई प्रत्यक्ष आर्थिक नोक्सानी पुर्‍याउँदै १२ करोड १३ लाख ४३ हजार ५३० रुपैयाँ गैरकानुनी लाभ लिएको प्रारम्भिक रूपमा पुष्टि भएको प्रहरीले जनाएको छ। उक्त कार्य मुलुकी अपराध संहिता, २०७४ अन्तर्गतको आपराधिक विश्वासघातसम्बन्धी कसूर तथा संगठित अपराध निवारण ऐन, २०७० अन्तर्गतको कसूरमा पर्ने देखिएको भन्दै प्रहरीले काठमाडौं जिल्ला अदालत, बबरमहलबाट पक्राउ अनुमति लिएको थियो।

सोही अनुमतिका आधारमा प्रहरीले २०८३ कात्तिक २७ गते ललितपुर महानगरपालिका–२५, भैंसेपाटीबाट ४५ वर्षीय नवीनकिशोर शर्मालाई पक्राउ गरेको हो। सर्लाहीको रामनगर गाउँपालिका–३ स्थायी ठेगाना भएका शर्मा हाल भैंसेपाटीमा बस्दै आएका थिए। उनी विराटनगर दुग्ध वितरण आयोजनाका प्रमुखका रूपमा कार्यरत थिए। पक्राउ परेका शर्मामाथि थप अनुसन्धान भइरहेको प्रहरीले जनाएको छ।

Skip This