वैदेशिक रोजगारीमा विभिन्न देश पठाइदिन्छु भन्दै ४६ लाख ८२ ठगी गर्ने चार प्रहरीको फन्दामा 

काठमाडौं – वैदेशिक रोजगारीमा आकर्षक तलबको प्रलोभनमा पारी विभिन्न देश पठाइदिन्छु भन्दै रकम ठगी गरेको अभियोगमा ४ जनालाई प्रहरीले पक्राउ गरेको छ। पक्राउ पर्नेहरूमा सिन्धुपाल्चोकका निमा तामाङ, महोत्तरीका विवेक साह, सप्तरीका उज्ज्वल कुमार थापा र तेह्रथुमका खेम बहादुर बस्नेत रहेका छन्। 

पक्राउमध्ये निमाले फ्रान्स पठाइदिन्छु भन्दै १ जना पीडितबाट २२ लाख ८५ हजार रुपैयाँ, विवेकले जर्जिया, माल्टा लगायतका देशहरू पठाइदिन्छु भन्दै २ जना पीडितहरूबाट ६ लाख ३५ हजार रुपैयाँ, उज्ज्वले हंगेरी र रोमानिया पठाइदिन्छु भन्दै २ जना पीडितहरूबाट ९ लाख ६२ हजार रुपैयाँ र खेम बहादुरले फ्रान्स पठाइदिन्छु भन्दै १ जना पीडितबाट ८ लाख रुपैयाँ ठगी गरेको प्रहरीले बताएको छ। 

पक्राउ मध्ये निमा र विवेकलाई आवश्यक अनुसन्धान तथा कारबाहीको लागि जिल्ला प्रहरी परिसर काठमाडौं पठाइएको छ भने उज्ज्वल र खेम बहादुरलाई वैदेशिक रोजगार विभाग ताहाचल काठमाडौं पठाइएको छ।