जापान पठाइदिन्छु भन्दै २५० जनालाई ठग्ने दुई जना पक्राउ, १ करोड २ लाख ठगी 

काठमाडौं – बेरोजगार युवायुवतीहरूलाई आकर्षक तलबको प्रलोभनमा पारी रोजगारीका लागि जापान लैजाने भन्दै २५० जना बढीलाई ठग्ने दुई जना पक्राउ परेका छन्। पक्राउ पर्नेमा तेह्रथुमका सुरज पंधाक लिम्बु र सोलुखुम्बुका कमल बहादुर पुलामी मगर रहेका छन्। 

प्रहरीका अनुसार उनीहरूमाथि ११ जनाले जाहेरी दिएका छन्। उनीहरूले निको परियोजना अन्तरगत जापानमा गुम्बा निर्माण गर्न कामदार लैजाने, खान बस्न सुविधासहित नेपाली २ लाख मासिक तलब दिने, प्रतिव्यक्ति लागत नेपाली १४ लाख लाग्ने भनी २५० भन्दा बढी पीडितहरूलाई ठगी गरेको खुल्न आएको छ। उनीहरूले २५० जनाबाट १ करोड २ लाख ठगी गरेको प्रहरीले जनाएको छ। 

उनीहरूलाई काठमाडौं उपत्यकाका विभिन्न स्थानहरूबाट पक्राउ गरी थप अनुसन्धान तथा आवश्यक कारबाहीको लागि जिल्ला प्रहरी परिसर भद्रकाली, काठमाडौंमा पठाइएको प्रहरीले जनाएको छ।