वैदेशिक रोजगारीको लागि विभिन्न देशहरूमा पठाइदिन्छु भन्दै ९ लाख ५४ हजार ठग्ने तीन जना पक्राउ 

काठमाडौं – बेरोजगार युवायुवतीहरूलाई आकर्षक तलबको प्रलोभनमा पारी रोजगारीका लागि विभिन्न देशहरूमा लैजाने भन्दै ठग्ने तीन जना पक्राउ परेका छन्। पक्राउ पर्नेमा दैलेखकी ज्वाला कुमारी चन्द,  कास्कीकी भिम कुमारी गुरुङ र गोरखाका भगवानराज मल्ल ठकुरी रहेका छन्। 

चन्दले अजरबैजान पठाइदिन्छु भन्दै ३ लाख ३४ हजार, गुरुङले हङकङ पठाइदिन्छु भन्दै ५ लाख र ठकुरीले बेलायत पठाइदिन्छु भन्दै १ लाख २० हजार ठगी गरेको प्रहरीले जनाएको छ। 

उनीहरूलाई काठमाडौं उपत्यकाका विभिन्न स्थानहरूबाट पक्राउ गरी थप अनुसन्धान तथा आवश्यक कारबाहीको लागि वैदेशिक रोजगार विभाग ताहाचल, काठमाडौंमा पठाइएको छ।