धरौटी नबुझाएपछि किस्पाङ गाउँपालिका अध्यक्ष कारागार चलान

काठमाडौं – नुवाकोटको किस्पाङ गाउँपालिकाका अध्यक्ष वीरबल तामाङ कारागार चलान भएका छन्। उनलाई केन्द्रीय कारागार सुन्धारा पठाइएको जिल्ला प्रहरी परिसर काठमाडौंका प्रवक्ता दान बहादुर थापाले बताए। 

काठमाडौं जिल्ला अदालतले बैंकिङ्ग  कसुर मुद्दामा २२ लाख धरौटी माग गरेको थियो। धरौटी नबुझाएपछि उनी कारागार चलान भएका हुन्। ९ वटा बैंकिङ्ग कसुर मुद्दामा फरार रहेका उनलाई जिल्ला प्रहरी परिसर काठमाडौंबाट खटिएको प्रहरीको टोलीले सोमबार सिंहदरबारको मुख्य गेटबाटै नियन्त्रणमा लिएको थियो। 

उनको जिल्ला प्रहरी परिसर काठमाडौंमा चार वटा बैंकिङ्ग कसुरको मुद्दा रहेको छ। साथै, जिल्ला प्रहरी परिसर भक्तपुर, प्रहरी वृत्त जनसेवा, प्रहरी वृत्त दरबारमार्ग, प्रहरी वृत्त लैनचौर र प्रहरी वृत्त महाराजगन्जमा एक–एक वटा बैंकिङ्ग कसुर मुद्दा रहेको खुल्न आएको छ।