वैदेशिक रोजगारीको लागि विभिन्न देशहरूमा पठाइदिन्छु भन्दै १२ लाख ९० हजार नगद ठगी गर्ने चारजना पक्राउ 

काठमाडौं बेरोजगार युवायुवतीहरूलाई आकर्षक तलबको प्रलोभनमा पारी रोजगारीका लागि विभिन्न देशहरूमा लैजाने भन्दै ठगी गर्ने चार जनालाई प्रहरीले पक्राउ गरेको छ । पक्राउ पर्नेमा तनहुँका विकाश गुरुङ,  सिन्धुलीका रन्जना अधिकारी,  ताप्लेजुङ यादव प्रसाद घिमिरे र कञ्चनपुरका लोकजन खड्का रहेका छन् ।  

गुरुङ अजरबैजान पठाई दिन्छु भनेर २ जना सँग पाँच लाख, अधिकारीले जापान पठाइदिन्छु भन्दै एक जनासँग तीन लाख, घिमिरेले जापान पठाइदिन्छु भन्दै पचास हजार र खड्काले थाईल्याण्ड पठाइदिन्छु भन्दै चार लाख चालिस हजार रुपैयाँ ठगी गरेका थिए । 

उनीहरूलाई काठमाडौंका विभिन्न स्थानहरूबाट पक्राउ गरी थप अनुसन्धान तथा कारबाहीको लागि वैदेशिक रोजगार विभाग ताहाचल काठमाडौं  पठाइएको प्रहरीले जनाएको छ ।