काठमाडौं–सरकारले सहकारीका कारण बचतकर्तामा परेको समस्या समाधान गर्न प्रक्रिया सुरु गर्ने बताएको छ । बिहीबार बसेको मन्त्रिपरिषदको बैठकमा सहकारीका कारण बचतकर्तामा परेका समस्याबारे छलफल भएको हो । सरकारकी प्रवक्ता रेखा शर्माले सहकारी र तिनका कारण बचतकर्तामा परेका समस्याको समाधान गर्न प्रक्रिया सुरू गर्ने निर्णय मन्त्रिपरिषदले गरेको उल्लेख गरिन् ।

‘मुलुकभर सहकारी समस्याका बारेमा कुरा उठेको छ। सहकारीबारे आज मन्त्रिपरिषद बैठकमा पनि गम्भीरतापूर्वक छलफल भयो,’ उनले भनिन्, ‘तत्काल कानूनमा व्यवस्था गरी सहकारी र तिनका कारण बचतकर्ताले बेहोर्नुपरेको समस्या समाधानको प्रक्रिया सुरू गर्ने निर्णय भएको छ।’

सामान्य र नियमित प्रक्रियाबाट सहकारी समस्या समाधान नहुने उनको भनाइ छ। विद्यमान कानूनबाट पनि यो सम्भव छैन, विद्यमान संरचनाबाट पनि यो सम्भव छैन त्यसकारण छिटोभन्दा छिटो कानूनी व्यवस्था पनि गर्नुपर्ने उनको धारणा छ । ‘आवश्यक पर्‍यो भने संरचना पनि बनाउनुपर्छ। सहकारी पीडितका समस्यालाई छिटोभन्दा छिटो हल गर्नुपर्छ भन्नेमा गम्भीरतापूर्वक छलफल भएको छ’ उनले भनिन् ।

पछिल्लो चरण सहकारी पीडितको विषयलाई लिएर विभिन्न किसिमका विरोध भएसँगै सरकारको ध्यानआकर्षण भएको हो । लामो समयदेखि सहकारीका बचतकर्ताहरुले आफ्नो बचत फिर्ता गर्न सरकार समक्ष माग गर्दै आएका थिए ।