डियर ह्याक २०२६ सम्पन्न, नवप्रवर्तन र दिगोपनामा केन्द्रित युवा प्रतिभाको उत्सव (फोटो फिचर)

काठमाडौं – तीन दिनसम्म चलेको विद्यार्थी नेतृत्वको प्रविधि महोत्सव ‘डियरह्याक २०२६’ सम्पन्न भएको छ। काठमाडौंस्थित डियरवाक कम्प्लेक्समा आयोजित उक्त ह्याकाथनले नेपाल र भारतका युवा नवप्रवर्तकहरूलाई एकै थलोमा ल्याएर सिर्जनशीलता, सहकार्य र प्रविधिमार्फत समाधान खोज्ने वातावरण प्रदान गरेको आयोजकले जनाएको छ।

डिडब्लुआईटी सफ्टवेयर क्लबद्वारा आयोजना गरिएको कार्यक्रममा इभेन्ट लिडद्वय दृश्य कार्की र श्रेयांश पोखरेलले नेतृत्व गरेका थिए। सन् २०२३ मा सुरु भएको डियरह्याक पछिल्ला वर्षहरूमा नेपालकै प्रमुख विद्यार्थी-नेतृत्वको प्रविधि कार्यक्रमका रूपमा स्थापित हुँदै गएको छ।

यस वर्षको संस्करणमा १७ टोली सहभागी भएका थिए। सहभागीहरूले ४८ घण्टासम्म निरन्तर काम गर्दै कृत्रिम बौद्धिकता (एआई), वातावरण, इन्टरएक्टिभ टेक्नोलोजी तथा ब्लकचेनलगायत विभिन्न विधामा आधारित परियोजनाहरू विकास गरेका थिए। कार्यक्रममा कार्यशाला, अनुभवी विज्ञहरूको मार्गदर्शन तथा परियोजना परिमार्जनका अवसरसमेत उपलब्ध गराइएको थियो।

प्रतिस्पर्धात्मक मूल्यांकनपछि दीपा खनाल, दिपेश सिंह, साजन साही कर्मी र मनी दास श्रेष्ठ सम्मिलित टिम ‘प्रोफिट.एक्सई’ लाई डियरह्याक २०२६ को ग्राण्ड विनर घोषणा गरिएको छ। टोलीले नवीन सोच, प्राविधिक उत्कृष्टता र सामाजिक प्रभावका आधारमा निर्णायकहरूको प्रशंसा बटुलेको थियो।

यस वर्षको विशेष आकर्षणका रूपमा ‘वातावरण ट्र्याक’ पहिलो पटक समावेश गरिएको थियो। डियरह्याक २०२६ को मुख्य विषय ‘पर्यावरणीय दिगोपना’ अनुरूप सहभागीहरूलाई वातावरणीय चुनौतीहरूको समाधानका लागि प्रविधि र नवप्रवर्तनको प्रयोग गर्न प्रोत्साहित गरिएको थियो।

उक्त वातावरण ट्र्याकमा भारतको पुणेस्थित जी.एच. रायसोनी विश्वविद्यालयको टिम ‘गोगिन्स’ विजेता बनेको छ। आर्या मनोज मिश्र, मान्सी दुबे, गोपाल पारिक र अद्वैत झा सम्मिलित टोलीले वातावरणीय प्रभावलाई ध्यानमा राखेर तयार पारेको समाधानका लागि सम्मान प्राप्त गरेको आयोजकले जनाएको छ।

प्रतिस्पर्धाबाहेक कार्यक्रममा सहभागीहरूबीच आपसी सम्बन्ध सुदृढ गर्न विभिन्न मनोरञ्जनात्मक गतिविधिहरू पनि सञ्चालन गरिएको थियो। प्रत्यक्ष सांगीतिक प्रस्तुति, मैत्रीपूर्ण फुटसल तथा ब्याडमिन्टन प्रतियोगितालगायत कार्यक्रमले ह्याकाथनको व्यस्ततालाई उत्साहपूर्ण बनाएको थियो।

आयोजक समितिले कार्यक्रम सफल बनाउन योगदान पुर्‍याउने सहभागी, मार्गदर्शक, निर्णायक, प्रायोजक, स्वयंसेवक तथा साझेदार संस्थाहरूप्रति आभार व्यक्त गरेको छ।

चौथो संस्करण सफलतापूर्वक सम्पन्न गर्दै डियरह्याकले नेपाल तथा बाहिरका युवा नवप्रवर्तकहरूको सञ्जाललाई थप बलियो बनाएको आयोजकको भनाइ छ। प्रतियोगिताभन्दा पनि विचारलाई प्रोत्साहन गर्ने, सहकार्यलाई बढावा दिने र नयाँ पुस्ताका सिर्जनशील प्रतिभालाई सशक्त बनाउने मञ्चका रूपमा डियरह्याक स्थापित हुँदै गएको उल्लेख गरिएको छ।