काठमाडौं – सानिमा जिआईसी इन्स्योरेन्स कम्पनीको संस्थापक समूहको ३ लाख ६४ हजार २८६ कित्ता शेयर बिक्री राखिएको हो। यो शेयरमा हाललाई विद्यमान संस्थापक शेयरधनीहरुले मात्रै खरिद आवेदन दिन पाउनेछन्।

खरिद आवेदन दिन कम्पनीले ३५ दिनको समयावधि दिएको छ। तोकिएको अवधिभित्र संस्थापक शेयरधनीहरुले काठमाडौंको नक्सालस्थित बिक्री प्रबन्धक कुमारी क्यापिटलको कार्यालयमा खरिद आवेदन दिनुपर्नेछ।

बिक्रीमा राखिएको शेयरको न्यूनतम मूल्य प्रतिकित्ता १८६ रुपैयाँ तोकिएको छ। यसको अर्थ लगानीकर्ताले न्यूनतम मूल्य वा सोभन्दा बढी बोलकबोल गरी बोलपत्र पेस गर्नुपर्नेछ।

तोकिएको म्यादभित्र संस्थापक शेयरधनीहरुबाट खरिद आवेदन नपरेको खण्डमा अन्य व्यक्ति तथा संस्थाका लागि शेयर बिक्री खुला गरिने कम्पनीले जनाएको छ।