वैदेशिक रोजगारीमा पठाइदिन्छु भन्दै ठगी गर्ने ६ जना प्रहरीको फन्दामा 

काठमाडौं – बेरोजगार युवायुवतीलाई आकर्षक तलबको प्रलोभनमा पारी रोजगारीका लागि विभिन्न देशहरूमा लैजाने भन्दै ठगी गर्ने ६ जनालाई प्रहरी पक्राउ गरेको छ। पक्राउ पर्नेमा रामेछापका रबिन्द्र खत्री, गोरखाका निरज गुरुङ, पर्साका रिन्कु कुमारी रौनियार, स्याङजाका हुम बहादुर कुँवर, सोलुखुम्बुका लोकेन्द्र बस्नेत र सुनसरीका तोरण कुमार कार्की रहेका छन्। 

खत्रीले बुल्गेरिया पठाइदिन्छु भन्दै तीन लाख, गुरुङले आइसल्यान्ड पठाइदिन्छु भन्दै ४ जनाबाट ११ लाख ५६ हजार, रौनियारले सर्बिया पठाइदिन्छु भन्दै ६ लाख, कुँवरले युके पठाइदिन्छु भन्दै २ जनाबाट ८८ लाख ७० हजार, बस्नेतले हङकङ पठाइदिन्छु भन्दै ३ लाख ३० हजार र कार्कीले सर्बिया पठाइदिन्छु भन्दै  ६ लाख ठगी गरेको प्रहरीले जनाएको छ।  

उनीहरूलाई काठमाडौं उपत्यकाका विभिन्न स्थानहरूबाट पक्राउ गरी थप अनुसन्धान तथा आवश्यक कारबाहीको लागि वैदेशिक रोजगार विभाग ताहाचल, काठमाडौंमा पठाइएको प्रहरीले जनाएको छ।