त्रिभुवन विमानस्थल अध्यागमन प्रमुखमा सिर्जना थपलिया

काठमाडौं – गृह मन्त्रालयले सह–सचिवहरूको सरुवा गर्दै त्रिभुवन अन्तर्राष्ट्रिय विमानस्थलस्थित अध्यागमन कार्यालयको प्रमुखमा सिर्जना थपलियालाई जिम्मेवारी दिएको छ।

हाल संखुवासभाको प्रमुख जिल्ला अधिकारी (सीडीओ) रहेकी थपलिया अब मुलुकको सबैभन्दा महत्वपूर्ण मानिने त्रिभुवन अन्तर्राष्ट्रिय विमानस्थल अध्यागमन कार्यालयको प्रमुखका रूपमा काम गर्ने छिन्। गृह मन्त्रालयले शुक्रबार १६ जना सह–सचिवहरूको सरुवा तथा जिम्मेवारी हेरफेर गरेको हो।

यसअघि विमानस्थल अध्यागमन प्रमुख रहेका नरहरि घिमिरेलाई ललितपुरको प्रमुख जिल्ला अधिकारीका रूपमा सरुवा गरिएसँगै उक्त पद रिक्त भएको थियो। रिक्त स्थानमा थपलियालाई खटाइएको मन्त्रालयले जनाएको छ।

त्यस्तै, गौतमबुद्ध अन्तर्राष्ट्रिय विमानस्थलस्थित अध्यागमन कार्यालयको प्रमुखमा बलराम निरौलालाई सरुवा गरिएको छ। निरौला यसअघि अन्य प्रशासनिक जिम्मेवारीमा रहेका थिए। विमानस्थल अध्यागमन प्रमुखको जिम्मेवारीलाई संवेदनशील र रणनीतिक मानिन्छ, जहाँ अन्तर्राष्ट्रिय आवागमन, सुरक्षा समन्वय तथा अध्यागमन नियन्त्रणका महत्वपूर्ण कामहरू सञ्चालन हुन्छन्।