बैंकिङ्ग कसुर मुद्दामा एक दिन र एक महिना कैद तोकिएका दुई जना पक्राउ 

काठमाडौं – बैंकिङ्ग कसुर मुद्दाका फरार दुई प्रतिवादीलाई जिल्ला प्रहरी परिसर ललितपुरबाट खटिइएको प्रहरी टोलीले पक्राउ गरेको छ। पक्राउ पर्नेमा ललितपुरका सगेन्द्र महर्जन र सिन्धुपाल्चोकका अन्जन कुमार बोम्जन रहेका छन्। 

प्रहरीका अनुसार उनीहरूलाई जिल्ला अदालत ललितपुरले बैंकिङ्ग कसुर मुद्दामा कैद र जरिवाना फैसला भएको थियो। महर्जनलाई बैंकिङ्ग कसुर मुद्दामा १ दिन कैद र ५ हजार जरिवाना तोकिएको थियो। साथै, बोम्जनलाई एक महिना कैद र दुई लाख जरिवाना तोकिएको थियो। तर, उनीहरू अदालतको फैसला पछि फरार  भएका थिए। 

सोही क्रममा उनीहरूलाई गोप्य सूचनाको आधारमा पक्राउ गरी फैसला कार्यान्वयनको लागि अदालतमा पेश गरिएको प्रहरीले जनाएको छ।