बैंकिङ्ग समाचार, काठमाडौं ।
नेपाल स्टक एक्सचेन्ज (नेप्से) साताको कारोबारको चौथो दिन आज बुधबार सामान्य अंकको गिरावट भएको छ । आज नेप्से ५.८९ अङ्कले घटेर १ हजार ८ सय ६७ दशमलव २२ विन्दुमा बन्द भएको हो । मंगलबार नेप्से १४.२२ अङ्कले बढेर १ हजार ८ सय ७३ दशमलव ११ विन्दुमा बन्द भएको थियो  । 

त्यस्तै, आज नेप्सेमा सुधार भएपनि कारोबार रकममा भने सामान्य गिरावट भई १ अर्बको पनि बारोबार हुन सकेन । आज नेप्सेमा ८६ करोड ३८ लाख रुपैयाँ बराबरको मात्रै कारोबार भएको छ । 

आज कारोबार भएका कम्पनीमध्ये ६३ वटा कम्पनीको शेयर मूल्य बढेको छ भने १४० वटा कम्पनीको शेयर मूल्य घटेको छ, ९ वटा कम्पनीको शेयर मूल्य स्थिर रहेको छ ।       

नेप्सेका अनुसार आज पाँच कम्पनीको सेयर मूल्यमा उच्च वृद्धि भएको छ । आज बधुबारको कारोबारबाट आँधिखोला लघुवित्त वित्तीय संस्थाको शेयर मूल्य १० प्रतिशतले बढेर प्रतिकित्ता १६५७ रुपैयाँ पुगेको छ भने सृजनशील लघुवित्त वित्तीय संस्थाको शेयर मूल्य पनि ९.९९ प्रतिशतले बढेर प्रतिकित्ता १०९६.२० रुपैयाँ पुगेको छ । त्यस्तै, इस्टर्न पावरको ९.९९ प्रतिशतले वृद्धि भएर २९७.९० मा पुगेको छ भने घलेम्दी पावरको ९.१४ प्रतिशतले वृद्धि भएर २०३ रुपैयाँ पुगेको छ । त्यस्तै धौलागिरी लघुवित्तको शेयरमूल्य ८ प्रतिशतभन्दा बढीले बढेर ६४९.५० रुपैयाँ पुगेको छ ।   

आज सबैभन्दा बढि पञ्चकन्या माइ हाइड्रोपावरको शेयरमुल्यमा सर्वाधिक गिरावट आएको छ । यसको शेयरमुल्य ६ प्रतिशत भन्दा बढिले घटेको हो । 

त्यसैगरी, आज सर्वाधिक शेयर कारोबार एनआइसी एसिया बैंकको भएको छ । यसको आज ११ करोड ८२ लाखभन्दा बढीको कारोबार भएको छ ।