काठमाडौं – सानिमा जीआईसी इन्स्योरेन्सले आफ्नो सातौँ वार्षिक साधारणसभा बोलाएको छ । कम्पनी सञ्चालक समितिको फागुन २६ गते बसेको बैठकले वार्षिक साधारणसभा आउँदो चैत २१ गते आयोजना गर्ने निर्णय गरेको हो। सभा काठमाडौंको कालिकास्थानस्थित अमृतभोगमा बिहान ११ बजेबाट सुरु हुनेछ।

सभाले कम्पनीको खर्च अनुमोदन गर्नुका साथै सञ्चालक समितिका अध्यक्ष तथा सदस्यहरुको भत्ता संशोधन गर्ने प्रस्ताव स्वीकृत गर्नेछ। सभाले गत आर्थिक वर्ष २०८०।८१का लागि वितरण गर्ने भनेर प्रस्तावित हाल कायम चुक्तापुँजी २ अर्ब रुपैयाँको कुल ७.८९४७ प्रतिशत लाभांश अनुमोदन गर्नेछ। जसमा ७.५ प्रतिशत बोनस शेयर र कर प्रयोजनार्थ ०.३९४७ नगद लाभांश छन्।

बोनस शेयर जारीपछि चुक्तापुँजी वृद्धि हुने भएकोले सोहीबमोजिम प्रबन्धपत्र र नियमावलीमा संशोधन गर्ने विशेष प्रस्ताव सभाले पारित गर्नेछ। छैटौँ वार्षिक साधारणसभाबाट पारित २५ प्रतिशत हकप्रद शेयर संशोधन गरी १७ प्रतिशत कायम गरी जारी गर्ने अर्को विशेष प्रस्ताव पनि सभाले अनुमोदन गर्नेछ।

लाभांश र साधारणसभा प्रयोजनार्थ कम्पनीले चैत ८ गते बुक क्लोज गर्ने निर्णय गरेको छ। यसको अर्थ चैत ८ गतेभन्दा अघिसम्म कायम शेयरधनीहरुमात्रै यो कम्पनीको लाभांश पाउन र सभा भाग लिन योग्य हुनेछन्।