नेक्सजेन म्यानेजमेन्टले लाभांशसहित साधारण सभा बोलायो

काठमाडाैं – नेक्सजेन म्यानेजमेन्ट सोलुसन्स प्राइभेट लिमिटेडले यही आश्विन १९ गते साधारण सभा आह्वान गरेको छ । काठमाडाैंकाे होटल यलो पगोडामा हुन गइरहेको सातौँ वार्षिक साधारण सभामा कम्पनीले नियमितको साथै विशेष प्रस्ताव पास गर्ने जनाएको छ।

पूर्व बैकंरहरुले सात वर्ष अगाडि सम्पत्ति व्यवस्थापन र सल्लाहका सेवा दिने गरी यो कम्पनी स्थापना गरेका थिए।तर विविध कारणले २०८१ वैशाख एक गतेबाट मात्र कम्पनीले नियमित कारोबार सञ्चालन गरेको थियो।

कम्पनीको सुरु संस्थापकमा बिएन घर्ती,बलराम विष्ट,रमेश कुमार भट्टराई, श्रीचन्द्र भट्ट,सुरेश सापकोटा,विनय उपाध्याय र कमल पन्थी थिए। कम्पनीले हालै प्रकाशित गरेको सूचना अनुसार आउने साधारण सभामा आ.व २०८०/८१ को बि विवरण पारित गर्ने, लेखा परीक्षकको नियुक्ति गर्ने र नयाँ सञ्चालक समितिको मनोनयन गर्ने साधारण प्रस्ताव राखेको छ।

त्यसै गरी विशेष प्रस्ताव अन्तर्गत “नेक्सजेन म्यानेजमेन्ट एण्ड ईक्विटि सोलुसन्स प्रा लि” रहने गरी कम्पनीको नाम परिवर्तन गर्ने,सोही बमोजिम उद्देश्य र गर्ने काम संशोधन गर्ने, जारी र चुक्ता पुँजी वृद्धि गर्ने तथा समान प्रकृतिको कम्पनीसँग मर्जर एक्विजिसन गर्ने विशेष प्रस्ताव पनि साधारण सभामा राखेको छ।

कम्पनीले कारोबार प्रारम्भ गरे पछि साना ठुला उद्योगपति व्यवसायीको कम्पनी प्रति आकर्षण बढेको थियो। लगानी सम्मेलनमा कोरियन कम्पनीले बिदेसी लगानी ल्याउन नेक्सजेन सँग सम्झौता पनि गरेको थियो । यसरी कम्पनी सञ्चालनको तीन महिनामा पाँच प्रतिशत लाभांश दिन सफल भए पछि नेक्सजेन म्यानेजमेन्टले कारोबार बिस्तार गर्ने लक्ष लिएको जनाएको छ।

कम्पनीले छिट्टै नियामक निकायको स्वीकृति लिएर पोर्टफोलियो म्यानेजमेन्ट, प्राइभेट ईक्विटि र भेन्चर क्यापिटल सम्बन्धी कामहरू, सल्लाहकार सेवा र सीमित मात्रामा केही संस्थाको सम्पत्ति व्यवस्थापन सम्बन्धित काम पनि गर्ने कार्यक्रम बनाएको कम्पनीका अध्यक्ष रमेश कुमार भट्टराईले जानकारी दिएका छन्।