बैंकिङ्ग समाचार, काठमाडौं ।
महालक्ष्मी विकास बैंक लिमिटेडले फागुन १३ गते शुक्रबार नेपाल प्रज्ञा प्रतिष्ठान, कमलादी काठमाडौंमा बिहान ११ बजे बीसौं वार्षिक साधारण सभा आह्वान गरेको छ ।

गणपुरक संख्या नपुगेपछि बैंक यसअघि बैंकले पुस २५ गते, आइतबार हुने भनिएको सभा स्थगित भएको थियो भने माघ ३ गते, सोमबार बोलाइएको सभा समेत उच्च अदालत पाटनको आदेशले स्थगित भएको थियो । स्थगित भएको वार्षिक साधारण सभा बैंकले फागुन १३ गते फेरि बोलाएको हो ।

सभाले बैंक सञ्चालक समितिको गत मंसिर १२ गते, आइतबार सम्पन्न बैठकले गरेको प्रस्ताव बमोजिम गत आर्थिक वर्ष २०७७/७८ को मुनाफाबाट सेयरधनीहरूलाई चुक्ता पूँजीको २० प्रतिशत बोनस सेयर र कर प्रयोजनका लागि १.०५ प्रतिशत नगद गरी कुल २१.०५ प्रतिशत लाभांश वितरण गर्ने प्रस्ताव अनुमोदन गर्नेछ ।

यसैगरी सभामा आर्थिक वर्ष २०७७/७८ को वार्षिक प्रतिवेदन, लेखापरिक्षण प्रतिवेदन, वासलात तथा सोका आधारमा तयार पारिएको वित्तीय विवरणहरु तथा आर्थिक वर्ष २०७८/७९ को लेखापरिक्षण गर्नका लागि सञ्चालक समितिबाट गरिएको लेखापरिक्षकको नियुक्ती र पारिश्रमीक अनुमोदन गर्ने लगायतका प्रस्तावहरु उपर छलफल गरी पारित हुनेछ ।