बैंकिङ्ग समाचार, काठमाडौं ।
राष्ट्र उत्थान लघुवित्त वित्तीय संस्था लिमिटेडको प्रारम्भिक सार्वजनिक निष्काशन (आईपीओ) फागुन ४ गते बुधबारदेखि निष्काशन तथा बिक्री खुला हुने भएको छ ।

लघुवित्तको धितोपत्र निष्काशन तथा बिक्री प्रबन्धक एनआईबिएल एस क्यापिटल लिमिटेडका अनुसार कम्पनीले प्रतिसेयर अंकित मूल्य एक सय रुपैयाँ अंकित दरका ८ करोड ५० लाख रुपैयाँ बराबरको ८ लाख ५० हजार कित्ता आईपीओ जारी गरेको हो ।

लघुवित्तले बिक्रीमा ल्याउने सेयरमध्ये जारी पूँजीको ०.५० प्रतिशत अर्थात १३ हजार कित्ता लघुवित्तका कर्मचारीहरुका लागि र कुल जारी सेयरको ५ प्रतिशत अर्थात ४२ हजार ५०० कित्ता सामूहिक लगानी कोषहरुलाई सुरक्षित गरिएको छ । बाँकी ७ लाख ९४ हजार ५०० कित्ता सेयरका लागि सर्वसाधारणले आवेदन दिन सक्नेछन् ।

फागुन ४ गतेदेखि निष्काशन तथा बिक्री खुला हुने आईपीओमा फागुन ८ गते आइतबारसम्म आवेदन दिन सकिनेछ । सो समयमा सबै सेयर बिक्री नभएको खण्डमा ढिलोमा फागुन १८ गतेसम्म आवेदन दिन सकिनेछ ।

लगानीकर्ताले न्यूनतम १० कित्तादेखि १ हजार कित्तासम्मका लागि आवेदन दिन सकिने व्यवस्था छ । यद्यपी आईपीओ जारी गर्ने कम्पनीमा उच्च आवेदन पर्ने गरेकाले १० कित्ता सेयरका लागि गरिने आवेदन नै प्रयाप्त हुने देखिन्छ ।

नेपाल धितोपत्र बोर्डबाट सि-आस्वा सदस्य अनुमति लिएका बैंक तथा वित्तीय संस्था र तिनका शाखा कार्यालयबाट पनि आईपीओमा आवेदन दिन सकिन्छ ।

आईपीओ निष्काशनका लागि कम्पनीले गराएको साख मूल्याङ्कनमा क्रेडिट रेटिङ्ग एजेन्सी इक्रा रेटिङ्ग नेपालले लघुवित्तलाई ‘इक्रा एनपी आईआर डबल बि रेटिङ्ग’ प्रदान गरेको छ । यो रेटिङ्ग प्राप्त संस्था समयमै वित्तीय दायित्व पूरा गर्नसक्ने सम्बन्धमा मध्यम जोखिम रहेको संकेत गर्दछ ।

हाल लघुवित्तको चुक्ता पूँजी १७ करोड ५० लाख रुपैयाँ छ । आईपीओ बिक्रीपछि लघुवित्तको चुक्ता पूँजी २६ करोड रुपैयाँ पुग्नेछ ।