बैंकिङ्ग समाचार, काठमाडौं ।
नबिल बैंक लिमिटेडले पुस ३० गते ३७औं वार्षिक साधारण सभा बोलाएको छ । बैंकको पुस ८ गतेको सञ्चालक समितिको बैठकले बैंकको केन्द्रिय कार्यालय परिसर नबिल सेन्टल, तीनधारा, दरवारमार्ग, काठमाडौंमा विहान ९ः३० बजे सभा गर्ने निर्णय गरेको हो । 

सभाले गत आर्थिक वर्ष ०७७/७८ सम्मको वार्षिक प्रतिवेदन सहितका वित्तीय विवरणहरु पारित गर्नुका साथै चालू आवको लागि लेखापरिक्षक नियुक्ती र निजको पारिश्रमिक निर्धारणको विषयलाई पनि टुङ्ग्याउनेछ । 

बैंकको सञ्चालक समितिको बैठकले गत आर्थिक वर्ष ०७७/७८ को मुनाफाबाट प्रस्ताव गरेको कुल ३८ प्रतिशत लाभांशलाई पनि सभाले वितरणयोग्य बनाउनेछ । बैंकको कात्तिक १६ गतेको सञ्चालक समितिको बैठकले हाल कायम चुक्तापूँजीको आधारमा ३३ दशमलव ६ प्रतिशत बोनस शेयर र कर प्रयोजनका लागि समेत ४ दशमलव ४ प्रतिशत नगद लाभांश वितरणको प्रस्ताव गरेको हो । हाल बैंकको चुक्तापूँजी रू. १३ अर्ब ८४ करोड ४४ लाख ५१ हजार रहेको छ । 

बैंकको यो वर्षको लाभांश विगत चार आर्थिक वर्षपछिकै उच्च हो । आर्थिक वर्ष ०७३/७४ मा ३० प्रतिशत बोनस शेयर र कर समेत १८ प्रतिशत नगद लाभांश गरी कुल ४८ प्रतिशत लाभांश वितरण गरेको यस बैंकले त्यस पछिका दुई आर्थिक वर्ष एउटै अनुपातमा अर्थात १२ प्रतिशत बोनस शेयर र कर समेत २२ प्रतिशत नगद लाभांश गरी कुल ३४ प्रतिशत लाभांश वितरण गरेको थियो । गत वर्ष भने बैंकले ३३ दशमलव ५ प्रतिशत बोनस शेयर र कर प्रयोजनका लागि १ दशमलव ७५ प्रतिशत नगद लाभांश गरी कुल ३५ दशमलव २६ प्रतिशत लाभांश वितरण गरेको थियो । 

यी प्रस्तावहरुसँगै संस्थापक समूहबाट दुई जना सञ्चालक निर्वाचन गर्ने कार्यक्रम समेत सभाका लागि तय भएको छ । साथै अन्य कुनै उपयुक्त बैंक तथा वित्तीय संस्थाहरुसँग मर्जर तथा प्राप्ती प्रकृयामा जान आवश्यक देखिएमा सो सम्बन्धी आवश्यक सम्पूर्ण कामको जिम्मेवारी सञ्चालक समितिलाई दिने निर्णय पनि सभाले गर्नेछ । सभा प्रयोजनका लागि बैंकले पुस १६ गते एक दिन  बुक क्लोज गर्ने भएको छ । बुक क्लोजको अघिल्लो कारोबारदिनसम्म कायम शेयरधनीहरु मात्र बैंकको सभामा भाग लिन र लाभांश प्राप्त गर्न योग्य हुनेछन् ।