काठमाडाैं – काठमाडौं उपत्यकाका विभिन्न स्थानमा आजदेखि करिब एक सातासम्म विद्युत् आपूर्ति बन्द हुने भएको छ । नेपाल विद्युत् प्राधिकरणले कीर्तिपुर, बानेश्वर, कुलेश्वर र जोरपाटी वितरण केन्द्रअन्तर्गतका विद्युतीय लाइन भूमिगत गर्ने कार्यका लागि विद्युत् कटौती गरिने जनाएको छ ।

विद्युत् बिहान ११ बजेदेखि दिउँसो ३ बजेसम्म (चार घण्टा) जानेछ । आइतबार साँखु फिडरअन्तर्गत साँखु बजारमा र चौमती फिडरअन्तर्गत छाउनी आर्मी अस्पताल क्षेत्रमा ११ बजेदेखि ३ बजेसम्म विद्युत् आपूर्ति अवरुद्ध हुनेछ ।

त्यसैगरी, सोमबार १४ गते केएमसी र पुरानो एयरपोर्ट फिडरअन्तर्गत सुविधानगर, सिनामंगल र भिमसेनगोला क्षेत्रमा बिजुली हुनेछैन । त्यस्तै, १६ गते कालीमाटी फिडरअन्तर्गत सोल्टी मोडदेखि कलंकी क्षेत्र, १७ गते रोपवे फिडरअन्तर्गतको मैत्रीनगर र टेगलाफाँट क्षेत्र तथा १८ गते मूलपानी फिडरअन्तर्ग पर्ने फिकल चोकदेखि बाबा चोकसम्म बिजुली कटौती हुने प्राधिकरणले जनाएको छ ।