बैकिङ्ग समाचार,काठमाडौं ।

नेपाल नागरिक उड्डयन प्राधिकरणले चालु आवका लागि ३६ अर्ब ६६ करोड रुपैयाँ बराबरको बजेट पास गरेको छ ।

प्राधिकरण सञ्चालक समितिले मंगलबार आर्थिक वर्ष २०८०÷८१ बजेट पास गरेको हो । 

प्राधिकरणले चालु आर्थिक वर्ष २०८०÷८१ का लागि ३६ अर्ब ६६ करोड रुपैयाँको अनुमानित आय–व्यय (बजेट) पास गरेको प्राधिकरणका प्रवक्ता जगनाथ निरौलाले जानकारी दिएका छन् ।

प्राधिकरणले अघिल्लो आर्थिक वर्ष ४१ अर्ब ८५ करोडको बजेट ल्याएको थियो । उक्त बजेटको तुलनामा चालु आर्थिक वर्ष प्राधिकरणको बजेट ५ अर्ब १९ करोडले घटेको छ । विशेषगरी, दुई राष्ट्रिय गौरवका अन्तर्राष्ट्रिय विमानस्थल गौतमबुद्ध र पोखरा सञ्चालनमा आइसकेकाले पनि यसपाली बजेट घटेको प्रवक्ता निरौलाले बताए ।