बैंकिङ्ग समाचार, काठमाडौं ।
कामना सेवा विकास बैंकले गत आर्थिक वर्ष २०७९/८० को चौंथो त्रैमासिक वित्तीय विवरण प्रकाशित गरेको छ । उक्त वित्तीय विवरण अनुसार यस अवधिमा बैंकले ४३ करोड रुपैयाँ बढी खुद नाफा कमाएको छ । 

बैंकले प्रकाशित गरेको वित्तीय विवरण वमोजिम गत त्रैमासको तुलनामा खराव कर्जामा सुधार भएको देखिन्छ । आ.व. २०७९/८० को तेश्रो त्रैमासमा ३.२७ प्रतिशत रहेको खराव कर्जा चौथो त्रैमासमा घटेर २.९८ प्रतिशत रहेको छ । बैंकको वेसरेट समेत तेश्रो त्रैमासको तुलनामा घटेको देखिन्छ । १२.५६ प्रतिशत रहेको वेसरेट घटेर ११.९३ प्रतिशत कायम भएको देखिन्छ । 

समिक्षा अवधिमा बैंकको खुद ब्याज आम्दानी बढेको छ । तर, संचालन खर्च तथा इम्पेरमेन्ट चार्ज वृद्धि भएपछि नाफा घटेको हो । समिक्षा अवधिमा बैंकको खुद ब्याज आम्दानी ८.६५ प्रतिशतले वृद्धि २ अर्ब १६ करोड ५० लाख रुपैयाँ कायम भएको छ । बैंकको कुल संचालन आम्दानी पनि ४.५५ प्रतिशतले वृद्धि भई २ अर्ब ४१ करोड ९४ लाख रुपैयाँ बढी पुगेको छ ।

समिक्षा अवधिमा बैंकले ४३ करोड ११ लाख ९८ हजार रुपैयाँ खुद नाफा कमाएको छ । यद्यपि, अघिल्लो आवको तुलनामा भने बैंकको नाफामा २६.९३ प्रतिशतले कमी हो । अघिल्लो आवमा बैंकले ५९ करोड बढी नाफा कमाएको थियो ।

यता, संचालन नाफा भने २०.०५ प्रतिशतले घटेर ६९ करोड १५ लाख रुपैयाँ कायम भएको छ । बैंकको वितरणयोग्य नाफा ५ करोड ८० लाख रुपैयाँ छ ।

बैंकको चुक्ता पुँजी ३ अर्ब २८ करोड ११ लाख रुपैयाँ छ । बैंकले जगेडा कोषमा भने १ अर्ब ५२ करोड ४३ लाख रुपैयाँ राखेको छ । बैंकको प्रतिसेयर आम्दानी (ईपीएस) १३ रुपैयाँ १४ पैसा र प्रतिसेयर नेटवर्थ १४६ रुपैयाँ ४६ पैसा रहेको छ ।