बैंकिङ्ग समाचार, काठमाडौं ।
ब्याजदर घटेसँगै हिजो उच्च अंकले बढेको नेपाल स्टक एक्सचेञ्ज (नेप्से) मा आज भने फेरि दोहोरो अंकले घटेको छ । साताको कारोबारको अन्तिम दिन आज बिहिवार नेप्से २९.०७ अंकले बढेर १ हजार ९ सय ३४ दशमलव ४७ विन्दुमा बन्द भएको छ । हिजो बुधवार नेप्से ९२.२२ अंकले बढेर १ हजार ९ सय ६३ दशमलव ५५ विन्दुमा बन्द भएको थियो ।

त्यस्तै, शेयर बजारमा दोहोरो अंकको गिरावट भएसँगै कारोबार रकम पनि घटेको छ । नेप्सेमा आज १ अर्ब ६५ करोड ३३ लाख रुपैयाँ बराबरको कारोबार भएको छ । बुधवार नेप्सेमा १ अर्ब ९७ करोड ६० लाख रुपैयाँ बराबरको कारोबार भएको थियो ।

नेप्सेका अनुसार आज कारोबार भएका २८ कम्पनीको शेयरमूल्य बढेको छ भने १८६ कम्पनीको शेयरमूल्य घटेको छ, ४ कम्पनीको शेयरमूल्य स्थिर रहेको छ ।

नेप्सेका अनुसार तीन कम्पनीको शेयरमूल्यमा उच्च वृद्धि भएको छ । आज आदर्श लघुवित्त वित्तीय संस्थाको शेयरमूल्य १० प्रतिशतले बढेर प्रतिकित्ता १३००.७० रुपैयाँ पुगेको छ । यसका साथै कालिञ्चोक दर्शन कम्पनीको शेयरमूल्य १० प्रतिशतले बढेर प्रतिकित्ता ५०१.८० रुपैयाँ पुगेको छ भने मोलुङ हाइड्रोपावरको शेयरमूल्य पनि १० प्रतिशतले बढेर प्रतिकित्ता १५५.१० रुपैयाँ पुगेको छ ।        

नेप्सेका अनुसार सिद्धार्थ इन्भेष्टमेन्ट ग्रोथ स्किमका लगानीकर्ताहरुले सर्वाधिक गुमाएका छन् । यसको शेयरमूल्य ५.५० प्रतिशतले घटेको छ । 

त्यस्तै, कारोबारको आधारमा आज सबैभन्दा बढी शिभम् सिमेन्ट लिमिटेडको भएको छ । यस कम्पनीको आज ८ करोड ४२ लाख रुपैयाँ भन्दा बढीको कारोबार भएको छ ।