बैंकिङ्ग समाचार, काठमाडौं ।
नेपाल स्टक एक्सचेञ्ज (नेप्से) मा तीन लघुवित्त कम्पनीको शेयरमूल्य समायोजन भएको छ । आरएमडीसी लघुवित्त, समता घरेलु लघुवित्त र मनकामना स्मार्ट लघुवित्तको शेयर मूल्य समायोजन भएको हो ।

साधारण सभा तथा लाभांश वितरण प्रयोजनका लागि यी लघुवित्तहरूले बुक क्लोज गरेसँगै नेप्सेले शेयर मूल्य समायोजन गरी नयाँ मूल्य निर्धारण गरेको हो । नेप्सेले आरएमडीसीको २६ प्रतिशत, समता घरेलुको १५ प्रतिशत र मनकामना स्मार्टको ४ दशमलव ७५ प्रतिशत बोनस शेयर समायोजन गरेको हो ।

समायोजन पश्चात् आरएमडीसी लघुवित्तको शेयरमूल्य रू. ७३८ दशमलव २५ कायम भएको छ भने समता घरेलु लघुवित्तको रू. ६३९ दशमलव ५७ र मनकामना स्मार्ट लघुवित्तको रू. ७२५ दशमलव ५४ कायम भएको छ ।

नेप्सेले मंगलवार कारोबार दिनको अन्तिम मूल्यका आधारमा यी लघुवित्तहरूको शेयरमूल्य समायोजन गरेको हो । मंगलवार दोस्रो बजारमा आरएमडीसी लघुवित्तको शेयर प्रतिकित्ता रू. ९३० दशमलव २०, समता घरेलुको रू. ७३५ दशमलव  ५० र मनकामना स्मार्टको रू. ७६० मा अन्तिम कारोबार भएको थियो । 

यही समायोजित मूल्यलाई आधार मानेर बुधवार (आज) दोस्रो बजारमा यी लघुवित्तहरूको शेयर कारोबार खुल्नेछ ।