बैंकिङ्ग समाचार, काठमाडौं ।
स्ट्याण्डर्ड चार्टर्ड बैंकले विक्री गरेको पाँच वर्षे अवधिको ऋणपत्र बाँडफाँट गरेको छ । बैंकले १० दशमलव ३० प्रतिशत ब्याजदरको ऋणपत्र माघ २६ गतेदेखि फागुन ८ गतेसम्म विक्री गरेको थियो । 

तोकिएको अवधिभित्र रितपूर्वक आवेदन दिएका आवेदकहरूलाई फागुन १७ गते ऋणपत्र बाँडफाँट गरिएको बैंकले जनाएको छ । बैंकले प्रतिऋणपत्र रू. १ हजार अंकित दरका रू. २ अर्ब ४० करोड बराबरको कुल २४ लाख कित्ता ऋणपत्र बाँडफाँट गरेको हो । 

यो ऋणपत्र विक्री प्रबन्धकमा एनआईबिएल एस क्यापिटल लिमिटेड रहेको छ । कुल कित्ता ऋणपत्रमध्ये बैंकले ६० प्रतिशत अर्थात् १४ लाख ४० हजार कित्ता ऋणपत्र व्यक्तिगत तवरबाट विक्री गरेको थियो । ४० प्रतिशत अर्थात् ९ लाख ६० हजार कित्ता ऋणपत्रमध्ये ४८ हजार कित्ता सामूहिक लगानीकोष र बाँकी सर्वसाधारणमा सार्वजनिक निष्कासनमार्फत विक्री गरिएको हो । 

वाणिज्य बैंकहरूले आफ्नो चुक्तापूँजीको २५ प्रतिशत ऋणपत्र अनिवार्य निष्कासन गर्नुपर्ने व्यवस्था बमोजिम यस बैंकले पनि ऋणपत्र निष्कासन गरेको हो ।