बैंकिङ्ग समाचार, काठमाडौं ।
इन्फिनिटी लघुवित्त वित्तीय संस्था लिमिटेडको छैठौं वार्षिक साधारण सभा तथा आफ्ना कर्मचारीहरुको नेतृत्व विकास (Leadership Symposium) तालिम सम्पन्न गरेको छ ।

संस्थाको आज बसेको साधारण सभाले चुक्ता पुँजी रु.४१ करोड ४५ लाख १३ हजार २ सय ८४ को २० प्रतिशतले कायम हुन आउने रु.८ करोड २९ लाख २ हजार ६ सय ५६ (अक्षरेपी आठ करोड उनन्तीस लाख दुईहजार छ सय छपन्न रुपैया मात्र) बराबरको बोनस सेयर वितरण गर्ने प्रस्ताव स्वीकृत गरेको छ । 

सभाले आ.व.२०७९/८० को लेखापरीक्षणको लागि लेखापरीक्षक नियुक्तिको सिफारिस तथा वित्तीय संस्थाले एक वा एकभन्दा वढी उपयुक्त लघुवित्त संस्थाहरु गाभ्ने/गाभिने तथा प्राप्ती गर्ने वा प्राप्ती हुन जाने प्रयोजनार्थ सम्वन्धि सम्पूर्ण कार्य गर्ने अख्तियारी समेत सञ्चालक समितिलाई प्रत्यायोजन गरेको छ । 

सभाले वित्तीय संस्थामा कार्यरत कर्मचारी मध्ये उत्कृष्ठ कार्य गर्ने कर्मचारीलाई Employee of the year को अवार्ड समेत प्रदान गरेको छ । सभा वित्तीय संस्थाका सञ्चालक समितिका अध्यक्ष बल राम विष्टको अध्यक्षतामा सम्पन्न भएको जानकारी संस्थाका कम्पनी सचिव तथा प्रमुख कार्यकारी अधिकृत प्रवीण कुमार लामाले बताए । 

साथै, संस्थाले मिति २०७९/११/११ गतेबाट मिति २०७९/११/१२ गतेसम्म कार्यक्रममा पूर्वाधार विज्ञ डा.सुर्यराज आचार्यको विशिष्ट आतित्थमा Leadership Symposium को बारेमा सहभागिहरुलाई प्रशिक्षित गरेका थिए । कार्यक्रममा विज्ञ डा.आचार्यले लघुवित्त सम्वन्धी विभिन्न किसिमका समस्या तथा चुनौतिहरुलाई समाधान गर्दै कसरी अगाडि बढ्ने विषयमा स्पष्ट पारेका थिए । 

कार्यक्रममा वित्तीय संस्थाको सञ्चालक समितिका अध्यक्ष बलराम विष्ट, स्वतन्त्र सञ्चालक महेश्वर प्रसाद जोशी तथा वित्तीय संस्थाका संस्थापक शेयरधनी दिनेश अधिकारीको समेत उपस्थिति रहेको  थियो । कार्यक्रममा वित्तीय संस्थाको अध्यक्ष बल राम विष्टले कर्मचारीहरुले हालको विषम परिस्थितिमा पनि उच्च गुणस्तरको कार्य सम्पादन गरेको र भोलिको दिनमा समेत सोहि बमोजिम कार्य गर्न उत्प्रेरित गरे ।

कार्यक्रम वित्तीय संस्थाको प्रमुख कार्यकारी अधिकृत प्रवीण कुमार लामाको सभापतित्वमा सञ्चालन भएको थियो ।