काठमाडौं–मंगलबार अपरान्ह कतारका अमिर (राजा) शेख तमिम बिन हमाद अल थानी नेपाल आउने भएकाले राजा चढेको विमान अवतरणको समयमा करिब आधा घण्टा विमानस्थलका अन्य उडान प्रभावित हुने भएका छन् ।

विमानस्थलका प्रवक्ता सुभाष झाका अनुसार केही समय मात्र विमानस्थल प्रभावित हुने भएको हो । प्रवक्ता झाका अनुसार दिउँसो साढे ४ देखि साँझ ५ बजेसम्मका लागि अन्य उडान बन्द गरिने छ । राष्ट्रपति रामचन्द्र पौडेलको निमन्त्रणामा अमिर शेख तमिम आजदेखि दुईदिने नेपालको राजकीय भ्रमण गर्दै छन् ।

उनी बंगलादेशको ढाका हुँदै पौने ५ बजे नेपाल आउन लागेका हुन् । राष्ट्रपतिको कार्यालयका अनुसार त्रिभुवन अन्तर्राष्ट्रिय विमानस्थलमा उनलाई स्वागत गर्न स्वयम् राष्ट्रपति पौडेल जाने छन् । अमिरको दुई दिने भ्रमणको सुरक्षा नेतृत्व नेपाली सेनाले गर्ने भएको छ । त्यसैगरी त्रिभुवन अन्तर्राष्ट्रिय विमानस्थलमा नेपाली सेनाले राजाको सम्मानमा २१ तोपको सलामी अर्पण गर्ने भएको छ । उनी बुधबार स्वदेश फर्किनेछन् ।