बैकिङ्ग समाचार ।

चन्द्रागिरी हिल्स लिमिटेडले आयोजना प्रभावित स्थानीयलाई निष्काशन गरेको आईपिओ बाँडफाँड भएको छ । बिक्रि प्रबन्धक ग्लोबल आईएमई क्यापिटलले बुधबार क्यापिटलको नक्साल स्थित कार्यालयमा शेयर बाँडफाँड गरेको हो ।

बाँडफाँड मोडल अनुसार १० देखि ७० कित्तासम्मको लागि आवेदन दिने माग गरे अनुसार कै शेयर पाएका छन्  । त्यस्तै ८० कित्तादेखि ३०६० कित्तासम्मको लागि आवेदन दिनेले समान ७० कित्ता शेयर पाएका छन्  । त्यस्तै ८० कित्तादेखि ३ हजार ६० कित्ताको लागि आवेदन दिने ३५ सय ६१ जना मध्यबाट गोलाप्रथा गरेर ११सय् ६३ जनाले थप १० किता शेयर पाएका छन्  । साथै ८० देखि ३०६० कित्तासम्मको लागि आवेदन दिएका तर गोलाप्रथाबाट १० कित्ता शेयर नपाएका २३ सय ९८ जना मध्येबाट गोलाप्रथा गरि ९ जनालाई थप १ कित्ता शेयर प्रदान गरिएको क्यापिटलले जनाएको छ  । यस हिसाबमा लगानीकर्ताले अधिकतम ८० कित्तासम्म शेयर पाएका छन्  ।

आईपिओमा ४८ सय ८ जनाले आवेदन दिएको मध्ये २०४ जनाको आवेदन रद्द भएकोले योग्य रहेका ४६ सय ४ जना आवेदकलाई मात्र  शेयर बाँडफाँड गरिएको क्यापिटलले जनाएको छ  । 

 कम्पनीले मङ्सिर १७ गतेदेखि आयोजना प्रभावित स्थानीयको लागि आईपिओ बिक्रि खुला गरेको थियो। कम्पनीले आयोजना प्रभावित स्थानीयको लागि प्रति कित्ता १ सय रुपैयाँ अंकित दरका ३ लाख ६ हजार ८ सय १९ कित्ता शेयर निष्काशन गरेको हो । स्थानीयलाई जारि गरिएको यस आईपिओमा काठमाडौँ जिल्लाको चन्द्रागिरी नगपालिका वडा नम्बर ३, ४, ६ र ७ का स्थानीय वासिन्दा र मकवानपुर जिल्लाको थाहा नगरपालिकाको वडा नम्बर ९ र १० का स्थानीय वासिन्दा र मकवानपुर कै इन्द्रसरोवर गाउँपालिका वडा नम्बर ५ का स्थानीय वासिन्दाले मात्र आवेदन दिन पाउने ब्यबस्था थियो। 

कम्पनीले स्थानीय र सर्बसाधारणको लागि गरि १८ करोड ४० लाख ९१ हजार बराबरको १८ लाख ४० हजार ९ सय १० कित्ता शेयर निष्काशन गर्नको लागि अनुमति पाएको छ । स्थानीयलाई शेयर जारी गरेपछि कम्पनीले सर्बसाधारणको लागि आईपिओ निष्काशन गर्ने छ ।  कम्पनीले यहि पुस महिना भित्र सर्बसाधारणलाई शेयर निष्काशन गर्ने जनाएको छ  ।