बैंकिङ्ग समाचार, काठमाडौं ।
नेपाल स्टक एक्सचेञ्ज (नेप्से)मा आज पनि दोहोरो अंकको गिरावट जारी रहेको छ । साताको कारोबारको पहिलो दिन आज आइतवार नेप्से १८.८० अंकले घटेर १ हजार ८ सय ८५ दशमलब ६० विन्दुमा बन्द भएको हो । बिहिवार नेप्से १५.७३ अंकले घटेर १ हजार ९ सय ४ दशमलब ४० विन्दुमा बन्द भएको थियो ।

त्यस्तै, नेप्सेमा दोहोरो अंकको गिरावट भएसँगै कारोबार रकममा पनि गिरावट भएको छ । नेप्सेमा आज ८२ करोड ८५ लाख रुपैयाँ बराबरको कारोबार भएको छ । बिहिवार नेप्सेमा ९८ करोड ३३ लाख रुपैयाँ बराबरको कारोबार भएको थियो ।

आज कारोबार भएका २९ कम्पनीको शेयरमूल्य बढेको छ भने १८८ कम्पनीकोे शेयरमूल्य घटेको छ, २ कम्पनीको शेयरमूल्य स्थिर रहेको छ ।

नेप्सेका अनुसार तिन कम्पनीको शेयरमूल्यमा उच्च वृद्धि भएको छ । आज आदर्श लघुवित्त वित्तीय संस्थाको शेयरमुल्य १० प्रतिशतले बढेर १,३३६.५० रुपैयाँ पुगेको छ भने सनराइज ब्लु चिप फण्डको शेयरमुल्य १० प्रतिशतले बढेर ९.३४ रुपैयाँ पुगेको छ भने कालिञ्चोक दर्शन कम्पनीको शेयरमूल्य ९.९९ प्रतिशतले बढेर प्रतिकित्ता ८८८.५० रुपैयाँ पुगेको छ ।

नेप्सेका अनुसार सनराइज फोकस्ड् इक्युटी फण्डका लगानीकर्ताहरुले सर्वाधिक गुमाएका छन् । यसको शेयरमूल्य १० प्रतिशतले घटेको छ ।

त्यस्तै, कारोबारको आधारमा आज सबैभन्दा बढी मोलुङ्ग हाइड्रोपावरको शेयरको भएको छ । यस कम्पनीको आज ३ करोड ११ लाख रुपैयाँ भन्दा बढीको कारोबार भएको छ ।