काठमाडौं – सूर्यज्योति लाइफ इन्स्योरेन्सको नाफामा १४६ प्रतिशतले बढेकाे छ । अघिल्लो आर्थिक वर्ष २०७९/८० मा १६ करोड ११ लाख रुपैयाँ खुद नाफा आर्जन गरेको इन्स्योरेन्सले आर्थिक वर्ष २०८०/८१ मा ३९ करोड ६५ लाख रुपैयाँ नाफा आर्जन गरेको हो ।

समीक्षा वर्षमा कम्पनीले ९ अर्ब ४७ करोड ४७ लाख रुपैयाँ बीमा शुल्क संकलन गरेको छ । जुन अघिल्लो आर्थिक वर्षको तुलनामा २९ प्रतिशतले बढी हो । आर्थिक वर्ष २०७९ /८० मा कम्पनीले ७ अर्ब ३४ करोड ३ लाख रुपैयाँ बीमा शुल्क उठाएको थियो ।

कम्पनीको वित्तीय रिपोर्ट अनुसार गत आर्थिक वर्ष २०८०/८१ को अन्तसम्ममा महाविपत्ति कोषमा ३४ करोड ६८ लाख रुपैयाँ जम्मा भएको छ भने रिटेन्ड अर्निङ्गमा ५६ करोड ९५ लाख रुपैयाँ र अन्य इक्विटीमा ६१ करोड ५२ लाख रुपैयाँ रहेको छ ।

कम्पनीको जीवन बीमा कोष ३३ अर्ब ६३ करोड रुपैयाँ रहेको छ भने आर्थिक वर्षमा पुनर्बीमामार्फत कम्पनीले ३६ करोड ८८ लाख रुपैयाँ खर्चिएको छ । अघिल्लो आर्थिक वर्षमा कम्पनीले १९ करोड ६५ लाख रुपैयाँ खर्चिएको थियो ।