क्यापिटल मार्केट डिस्कोर्शको वक्तामा नेसनल क्यापिटलका सीईओ अर्पण खनाल सहभागी हुने 

काठमाडौं – नेपाल क्यापिटल मार्केट डिस्कोर्शको वक्ताका रुपमा नेसनल क्यापिटलका संस्थापक तथा प्रमुख कार्यकारी अधिकृत (सीईओ) अर्पण खनाल सहभागी हुने भएका छन्। डिस्कोर्शको पहिलो सत्र ‘उत्पादन, नीति तथा नियमनः नेपालको पुँजी बजारको भविष्य’ मा उनी सहभागी हुने भएका हुन्।

व्यावसायिक यात्रा जेपी मोर्गनको इन्भेस्टमेन्ट बैंकिङ्ग विभागबाट सुरु गरेका खनालले नेपालमा दुईवटा ‘क्विक सर्भिस रेस्टुरेन्ट’ स्थापना गरेका छन्। सन् २०१७ मा ती दुवै व्यवसाय बिक्री गरेपछि उनी त्यहाँबाट बाहिरिएका थिए। सन् २०१५ मा सीएफए पूरा गरेपछि उनले पुनः लगानी क्षेत्रमा प्रवेश गर्ने निर्णय गरे। नेपालको ‘प्राइभेट इक्विटी तथा भेन्चर क्यापिटल’ क्षेत्रमा प्रवेश गरेका उनले ‘ट्रु नर्थ एसोसिएट्स’मा लगानी व्यवस्थापकका रूपमा काम गर्न थाले। लगानी क्षेत्रमा आफ्नो अनुभवलाई थप विस्तार गर्दै उनले सन् २०१८ मा केपीआईएसको स्थापना गरे।

नेपालको पुँजी बजारबारे बृहत छलफल गर्ने लक्ष्यसहित बैंकिङ्ग समाचारको आयोजना र नासा सेक्यूरिटिजको मुख्य प्रायोजनमा नेपाल क्यापिटल मार्केट डिस्कोर्श हुन लागेको छ। पुँजी बजारको नीतिगत सुधार, नियामकीय अवस्थाको चर्चा र सुधार तथा लगानीकर्ताको हकहित र शेयर शिक्षा फैलाउने लक्ष्यसहित नेपाल क्यापिटल मार्केट डिस्कोर्श आयोजना हुन लागेको हो।

क्यापिटल मार्केट डिस्कोर्श यही वर्ष २०८३ साल भदौ २१ गते काठमाडौंको मेरियट होटलमा हुनेछ। जसमा उद्घाटन सत्रसहित ४ वटा सत्रगत छलफल हुनेछन्। डिस्कोर्शको पहिलो सत्र ‘उत्पादन, नीति तथा नियमनः नेपालको पुँजी बजारको भविष्य’, दोस्रो सत्र ‘सचेत लगानीकर्ता, सबल पुँजी बजारः सचेतना र साक्षरताको भूमिका’ तेस्रो सत्रमा ‘प्रविधि तथा नवप्रवर्तनः नेपालको पुँजी बजारको भविष्य’ नामक सत्र गत छलफल हुने छन्। 

यस्तै, डिस्कोर्शमा नेपाल धितोपत्र बोर्डका अध्यक्ष डा. गोपाल भट्टसँग विशेष डुओलग समेत हुनेछ। सत्रगत छलफलमा नियमन र नीति निर्माण, लगानीकर्तामा शेयर शिक्षा र शेयर बजारमा प्रविधि र इनोभेसनसँग सम्बन्धित हुनेछन्। डिस्कोर्शमा अर्थ मन्त्रालय, नेपाल धितोपत्र बोर्ड, नेपाल राष्ट्र बैंक, नेपाल स्टक एक्सचेन्ज, सीडीएससी एन्ड क्लियरिङ, ब्रोकर कम्पनी, मर्चेन्ट बैंक, वाणिज्य तथा विकास बैंक, क्रेडिट रेटिङ र सूचीकृत कम्पनीहरुको सहभागिता रहनेछ। यस्तै, प्रतिनिधि सभाका सदस्यहरू, सेक्युरिटी एन्ड एक्सचेन्ज बोर्ड अफ इन्डिया (सेबी) र बम्बई स्टक एक्सचेन्ज (बीएसई) लगायत अन्तर्राष्ट्रिय प्रतिनिधिहरूको समेत सहभागिता रहनेछ।