काठमाडौं– नेपाल लाइफ इन्स्योरेन्स कम्पनीले गत आर्थिक वर्षमा ५१ करोड ३९ लाख खुद नाफा आर्जन गरेको छ । कम्पनीले गत आवको वित्तीय विवरण सार्वजनिक गर्दै अघिल्लो आवको तुलनामा ३०.८ प्रतिशतले नाफा बढेको देखाएको हो । अघिल्लो आर्थिक वर्षमा कम्पनीले ३९ करोड २९ लाख नाफा आर्जन गरेको थियो ।

कम्पनीको मुख्य बिजनेस आम्दानी अर्थात् खुद प्रिमियम आम्दानी भने ९.८ प्रतिशत बढेको छ । यस्तो आम्दानी अघिल्लो आर्थिक वर्षमा ३६ अर्ब ५१ करोड रुपैयाँ रहेकोमा गत आर्थिक वर्षमा ४० अर्ब ११ करोड रुपैयाँ छ । कम्पनीको कुल आम्दानी १२.३ प्रतिशत बढेको छ । गत आर्थिक वर्षमा कम्पनीको कुल आम्दानी ५९ अर्ब १७ करोड रुपैयाँ छ ।

हालसम्म कम्पनीको चुक्तापुँजी ८ अर्ब २० करोड रुपैयाँ रहेको छ भने कम्पनीको सञ्चित नाफा ५ अर्ब २८ करोड रुपैयाँ रहेको छ ।