क्यापिटल मार्केट डिस्कोर्शको वक्ताका रूपमा नासा सेक्युरिटिजका अध्यक्ष मदन पौड्याल सहभागी हुने

काठमाडौं – नेपाल क्यापिटल मार्केट डिस्कोर्शको वक्ताका रूपमा नासा सेक्युरिटिजका अध्यक्ष मदन पौड्याल सहभागी हुने भएका छन् । यही भदौ २१ गते हुने डिस्कोर्शको वक्ताका रूपमा उनी सहभागी हुने भएका हुन् ।

शंकरदेव क्याम्पसबाट एमबीएस गरेका पौड्याल विगत तीन दशकदेखि लगानी तथा पूँजी बजार क्षेत्रमा सक्रिय छन् । उनले लगानी बजारमा आफ्नो व्यावसायिक करिअरको सुरुवात अग्रवाल सेक्युरिटिजमा एकाउन्ट अफिसरका रूपमा गरेका थिए। उनी हाल नेपालको सबैभन्दा ठूलो स्टक ब्रोकर नासा सेक्युरिटिज कम्पनीको अध्यक्षका रूपमा कार्यरत रहेका छन् ।

पौड्याल यसअघि नासा सेक्युरिटिजमा प्रबन्ध निर्देशकका रूपमा कार्यरत थिए। प्रबन्ध निर्देशकका रूपमा उनले कम्पनीको व्यवसाय विस्तार तथा संस्थागत विकासमा नेतृत्वदायी भूमिका निर्वाह गरेका थिए। यसअघि उनी अनलाइन सेक्युरिटिजमा फाइनान्स अफिसरको रुपमा कार्यरत थिए ।

नेपालको पुँजी बजारबारे बृहत छलफल गर्ने लक्ष्यसहित आयोजित डिस्कोर्शमा बैंकिङ्ग समाचारको आयोजना र नासा सेक्यूरिटिजको मुख्य प्रायोजन रहेको छ। पुँजी बजारको नीतिगत सुधार, नियामकीय अवस्थाको चर्चा र सुधार तथा लगानीकर्ताको हकहित र शेयर शिक्षा फैलाउने लक्ष्यसहित नेपाल क्यापिटल मार्केट डिस्कोर्श आयोजना हुन लागेको हो ।

क्यापिटल मार्केट डिस्कोर्श यही भदौ २१ गते काठमाडौंको मेरियट होटलमा हुनेछ। जसमा उद्घाटन सत्रसहित ४ वटा सत्रगत छलफल हुनेछन्। यस्तै, डिस्कोर्शमा नेपाल धितोपत्र बोर्डका अध्यक्ष डा। गोपाल भट्टसँग विशेष डुओलग समेत हुनेछ। सत्रगत छलफलमा नियमन र नीति निर्माण, लगानीकर्तामा शेयर शिक्षा र शेयर बजारमा प्रविधि र इनोभेसनसँग सम्बन्धित हुनेछन्।

डिस्कोर्शमा अर्थ मन्त्रालय, नेपाल धितोपत्र बोर्ड, नेपाल राष्ट्र बैंक, नेपाल स्टक एक्सचेन्ज, सीडीएससी एन्ड क्लियरिङ, ब्रोकर कम्पनी, मर्चेन्ट बैंक, वाणिज्य तथा विकास बैंक, क्रेडिट रेटिङ र सूचीकृत कम्पनीहरुको सहभागिता रहनेछ। यस्तै, प्रतिनिधि सभाका सदस्यहरू, सेक्युरिटी एन्ड एक्सचेन्ज बोर्ड अफ इन्डिया (सेबी) र बम्बई स्टक एक्सचेन्ज (बीएसई) लगायत अन्तर्राष्ट्रिय प्रतिनिधिहरूको समेत सहभागिता रहनेछ।