नास आइटी एक्स्पो आयोजना हुने 

काठमाडौं – नेपाल एसोसिएसन फर सफ्टवेयर एण्ड आइटी सर्भिसेस कम्पनीज नास आईटीले नास आइटी एक्स्पो २०२६ गर्ने भएको छ । आगामी नोभेम्बर २१ देखि २२ सम्म हेरिटेज गार्डेन सानेपामा एक्सपो हुन लागेको हो। दुई दिने यस एक्स्पोले नेपालको प्रविधि क्षेत्र, व्यवसाय, नीतिनिर्माता, लगानीकर्ता, उद्यमी, विद्यार्थी तथा प्रविधि प्रेमीहरूलाई एकै थलोमा ल्याई नवप्रवर्तन, सहकार्य तथा व्यावसायिक अवसरहरू सिर्जना गर्ने लक्ष्य राखेको छ । 

नास आइटी एक्स्पोमा २०२५ को उल्लेखनीय सफलतालाई निरन्तरता दिँदै यस वर्षको एक्स्पोले प्रविधि कम्पनीहरूलाई आफ्ना नवीन समाधानहरू प्रस्तुत गर्ने, व्यवसायहरूसँग प्रत्यक्ष रूपमा जोडिने तथा दीर्घकालीन सहकार्य र साझेदारी विस्तार गर्ने अझ सशक्त मञ्च प्रदान गर्ने उद्देश्य राखेको छ। साथै, यसले नेपालको डिजिटल रूपान्तरणलाई थप गति दिने विश्वास लिइएको छ।

सन् २०२५ मा सम्पन्न नास आइटी एक्स्पो मा २,५०० भन्दा बढी सहभागी तथा ३० भन्दा बढी प्रविधि कम्पनीहरूको सहभागिता रहेको थियो, जसले यसलाई नेपालको सबैभन्दा ठुलो व्यवसाय केन्द्रित प्रविधि प्रदर्शनीहरूमध्ये एकको रूपमा स्थापित गरेको थियो। एक्स्पोमा उद्योगका अग्रणी व्यक्तित्वहरू, सरकारी प्रतिनिधिहरू, विभिन्न देशका राजदूतहरू, लगानीकर्ताहरू, कर्पोरेट प्रतिनिधिहरू, स्टार्टअपहरू, विद्यार्थीहरू तथा प्रविधिप्रेमीहरूको उल्लेखनीय सहभागिता रहेको थियो। सहभागी कम्पनीहरूले नयाँ व्यावसायिक सम्भावनाहरू पहिचान गर्ने, महत्वपूर्ण व्यापारिक सम्पर्क विस्तार गर्ने, नयाँ उत्पादन तथा समाधानहरू प्रस्तुत गर्ने र दीर्घकालीन साझेदारीका अवसरहरू सिर्जना गर्ने अवसर प्राप्त गरेका थिए ।

गत वर्षको सफलतालाई आधार बनाउँदै नास आइटी एक्स्पोले नेपालको बढ्दो प्रविधि क्षमतालाई अझ प्रभावकारी रूपमा प्रस्तुत गर्दै स्थानीय आइटी समाधानहरूको प्रवद्र्धन गर्ने आयोजकले जनाएको छ। एक्स्पोले प्रविधि कम्पनीहरू र विभिन्न व्यवसायबिच सहकार्यको वातावरण सिर्जना गर्दै नवप्रवर्तन, ज्ञान आदानप्रदान तथा नेपालको डिजिटल अर्थतन्त्रको दिगो विकासमा योगदान पुर्‍याउने अपेक्षा गरिएको छ ।

यस वर्षको एक्स्पोका मुख्य आकर्षणमा अग्रणी आइटी कम्पनीहरू तथा परिवर्तनशील स्टार्टअपहरूको प्रविधि प्रदर्शनी, व्यवसायका वास्तविक चुनौतीहरू समाधान गर्ने उत्पादन तथा प्रविधि समाधानहरूको प्रदर्शन, प्रविधि कम्पनी, व्यवसाय, लगानीकर्ता तथा सरोकारवालाबिच नेटवर्किङ तथा सहकार्यका अवसरहरू, डिजिटल रूपान्तरण, कृत्रिम बौद्धिकता, साइबर सुरक्षा, क्लाउड कम्प्युटिङ तथा उदीयमान प्रविधिहरू सम्बन्धी ज्ञानमूलक सत्रहरू, नयाँ साझेदारी, व्यापारिक अवसर तथा नेपालको प्रविधि क्षेत्रका पछिल्ला विकासबारे जानकारी प्राप्त गर्ने अवसर हुने नास आईटीले जनाएको छ।

नेपाल एसोसिएसन फर सफ्टवेयर एण्ड आइटी सर्भिसेस कम्पनीज नेपालको सफ्टवेयर तथा सूचना प्रविधि क्षेत्रको प्रतिनिधित्व गर्ने गैरनाफामूलक संस्था हो। नास आइटीले नवप्रवर्तन, उद्यमशीलता तथा व्यावसायिक उत्कृष्टतालाई प्रवद्र्धन गर्दै नीतिगत पैरवी, क्षमता अभिवृद्धि तथा सहकार्यका कार्यक्रममार्फत नेपालको प्रविधि उद्योगको दिगो विकास र विश्वव्यापी प्रतिस्पर्धात्मक क्षमता अभिवृद्धिमा योगदान पुर्‍याउँदै आएको छ।