काठमाडौं– अर्थ मन्त्रालयअन्तर्गतकाे सार्वजनिक ऋण व्यवस्थापन कार्यालयले आज (बिहीबार) एक सूचना गर्दै ५ अर्ब रुपैयाँ बराबरको नागरिक बचत पत्र बिक्री गर्ने जानकारी दिएको छ ।

कार्यालयले बिहीबार सूचना जारी गर्दै वैशाख ३० गतेदेखि इच्छुक खरिदकर्ताले बचतपत्र खरिदका लागि अनलाइनमार्फत् आवेदन पेस गर्न सकिने जनाएको हाे। जेठ ३० गतेसम्म बिक्री हुने यस बचत पत्रको निष्कासन असार ४ गते हुने कार्यालयले जनाएको छ ।

बचत पत्रको किसिम स्टकका रुपमा जारी हुने बताइएको छ । आवेदन रकम भुक्तानीका लागि बचत पत्र निष्कासन हुने दिन असार ४ गते दिउँसो ३ बजेसम्म बैंक तथा वित्तीय संस्थाले आवेदकको खातामा खर्च लेखी नेपाल सरकारको खातामा जम्मा गर्नुपर्ने कार्यालयले जनाएको छ ।

अर्थवार्षिक रुपमा ८ प्रतिशत वार्षिक व्याजदर रहने बचत पत्र खरिदका लागि घटीमा १० हजार र बढीमा कुल निष्कासित रकमको सीमा नबढाई १० हजारले निःशेष भाग जाने अंक बराबरको रकमको लागि आवेदन दिन सकिने सूचनामार्फत जानकारी दिइएको छ ।