काठमाडौं– लक्ष्मी सनराइज बैंक लिमिटेडका एक सञ्चालकले ऋणीलाई दिएको ऋण आफैले प्रयोग गरेको पाइएको छ । तत्कालिन लक्ष्मी बैंक लिमिटेडका १ प्रतिशतभन्दा बढी शेयर धारण गरेका संस्थापक शेयरधनी राजेन्द्र कुमार खेतानले सोही बैंकको ऋणी पंकज झुनझुनवालालाई प्रवाह गरेको ऋण आफुले प्रयोग गरेको खुलेको हो ।

बैंकले झुनझुनवालालाई प्रवाह गरेको रु.१२ करोड कर्जा मध्ये रु. ११ करोड ४४ लाख रकम आफ्नो खातामा ट्रान्सफर गरेको र उक्त कर्जाको ब्याजसमेत निज खेतानको खाताबाट ट्रान्सफर गरी भुक्तानी गरेको पाइएको छ । यसो गर्नु नेपाल राष्ट्र बैंकबाट बैंक तथा वित्तीय संस्थालाई जारी एकीकृत निर्देशन, २०८० को इ.प्रा. निर्देशन नं ६/८० को बुँदा ८ (ख) मा भएको व्यवस्था उल्लङ्घन भएको देखिन आएकोले बैंक तथा वित्तीय संस्था सम्बन्धी ऐन, २०७३ को दफा १०० को उपदफा (२) बमोजिम राजेन्द्र कुमार खेतानलाई रु.१० लाख जरिवाना गरिएको राष्ट्र बैंकले जनाएको छ ।

त्यस्तै, लक्ष्मी बैंकका तत्कालिन प्रमुख कार्यकारी अधिकृतलाई नेपाल राष्ट्र बैंक ऐन, २०५८ को दफा १०० को उपदफा (२) (क) बमोजिम सचेत गराइएको बैंकले जनाएको छ । बैंकबाट प्रवाह भएको कर्जा बैंकका शेयरधनीको खातामा ट्रान्सफर भएको देखिएको र बैंकले समयमा नै उक्त कर्जाको सदुपयोगिता अनुगमन नगरेको भन्दै सीईओलाई सचेत गराएको हो ।