काठमाडौं – आज २६ अप्रिल अर्थात् विश्व ‘पाइलट दिवस’। उड्डयन क्षेत्रमा पाइलटहरूको सम्मानमा समर्पित रहेर यो दिवस मनाइन्छ। पाइलटहरूको विशेषज्ञता, समर्पण र अटल प्रतिबद्धताले सबै यात्रुहरूको लागि सुरक्षित र सहज उडानहरू सुनिश्चित गर्ने भएकाले यो दिवसलाई उड्डयनको क्षेत्रमा महत्त्वपूर्ण मानिन्छ । पाइलटहरू आकाशका नायक भएकाले उनीहरूको सम्मान स्वरूप यो दिवस सन् २०१३ मा मनाउने निर्णय गरी २०१४ बाट वार्षिक रूपमा मनाउन थालिएको हो।

पाइलटहरूको प्रतिनिधित्व गर्ने विश्वव्यापी संगठन इन्टरनेशनल फेडेरेसन अफ एयर लाइन पाइलट्स एसोसिएसनबाट अप्रिल २६ लाई अन्तर्राष्ट्रिय उत्सवको रूपमा स्थापित गर्ने प्रयास सुरु भएको हो। जसलाई अन्तर्राष्ट्रिय नागरिक उड्डयन संगठन (आईकाओ) ले पनि महत्वका साथ मनाउने गरेको छ।

विश्व पाइलट दिवस मनाउन प्रारम्भ गरेको संस्था इन्टरनेशनल फेडेरेसन अफ एयर लाइन पाइलट्स एसोसिएसन पाइलटहरूको विश्वव्यापी आवाजको प्रतिनिधित्व गर्ने गैर नाफामूलक संस्था हो । यो संस्थामा १ सय देशबाट १ लाख बढी सदस्य रहेका छन्। यो संस्थाको मुख्य उद्देश्य भनेकै पाइलटिंग र आकाशमा सुरक्षाको  उत्कृष्ट प्रत्याभूति सुनिश्चित गर्नु हो।

अप्रिल २६  अर्थात् विश्व ‘पाइलट दिवस’ को महत्त्व टर्कीको उड्डयन इतिहासको एक महत्त्वपूर्ण व्यक्तित्व मेहमेट फेसा एभ्रेन्सेभले सन् १९१२ मा गरेको  उद्घाटन उडानलाई दिइएको उच्च सम्मानबाट जन्मिएको हो। उनी टर्कीको पहिलो सैन्य पाइलट थिए । जसकाे युद्धको समयमा सैन्य मिसनहरूमा भाग लिएर प्रारम्भिक उड्डयन विकासमा महत्त्वपूर्ण भूमिका रह्याे। पछि, उनले टर्कीको उड्डयन क्षेत्रमा महत्त्वपूर्ण पदहरू सम्हालेका थिए। जसमा देशको पहिलो हवाई यातायात संगठनको महानिर्देशकको रूपमा जुन अन्ततः टर्किस एयरलाइन्समा विकसित भयो। उनको  भूमिकालाई जीवित राख्दा सम्पूर्ण पाइलटको सम्मान हुने विश्वासका साथ यो दिवसको प्रारम्भ भएको हो।

‘विश्व पाइलट दिवस’ ले  व्यावसायिक, निजी, निर्देशनात्मक, सैन्य र मनोरञ्जन उड्डयनमा फैलिएको पाइलटहरूको विविध भूमिकालाई सम्मानका साथ स्वीकार गर्दछ। पाइलट दिवस मनाइरहँदा  उड्डयन क्षेत्रमा  यसको  महत्त्व  अतुलनीय छ। किनकि यसले उड्डयन सुरक्षा र दक्षतामा पाइलटहरूको महत्त्वपूर्ण भूमिकालाई सम्मान गर्दछ। यसले विश्वभर सुरक्षित हवाई यात्रामा उनीहरूको समर्पण, सीप र योगदानको सम्झना गर्दछ। यो दिन विश्वभर यात्रुहरूको लागि सहज र सुरक्षित यात्रा सुनिश्चित गर्न पाइलटहरूले खेल्ने अपरिहार्य भूमिकालाई प्रोत्साहन गर्ने गरिन्छ। विश्व पाइलट दिवस पाइलटहरूको स्थायी विरासत र उड्डयनको विकासमा उनीहरूको महत्त्वपूर्ण भूमिकाको प्रमाणको रूपमा खडा छ।