दुई महिनामै विभागको कारबाहीमा परे ७४ फर्म, २२ लाखभन्दा बढी जरिवाना


काठमाडौं – वाणिज्य, आपूर्ति तथा उपभोक्ता संरक्षण विभागले उपभोक्तामाथि हुने ठगी, कालोबजारी, कृत्रिम मूल्यवृद्धि र व्यापारिक बेथिति नियन्त्रण गर्न अनुगमनलाई तीव्र बनाएको छ। विभागले पछिल्लो दुई महिना (असोज र कात्तिक) मा मात्रै ८८७ वटा व्यावसायिक फर्मको अनुगमन गरी कैफियत भेटिएका ७४ वटा फर्मलाई कारबाही गरेको छ। विभागका महानिर्देशक रितेशकुमार शाक्यले जिम्मेवारी सम्हालेयता बजार अनुगमनलाई नियमित र परिणाममुखी बनाउने प्रयासस्वरूप टोली परिचालन बढाइएको हो। यस अवधिमा कारबाहीमा परेका फर्महरूबाट २२ लाख ८२ हजार रूपैयाँ जरिवाना असुल गरी राजस्वमा दाखिला गरिएको विभागले जनाएको छ।

बजारमा उपभोक्ताको हितविपरीत हुने गतिविधि नियन्त्रण गर्न विभागले दैनिक पाँचदेखि १० वटासम्म अनुगमन टोली परिचालन गर्दै आएको महानिर्देशक शाक्यले बताए। उनका अनुसार बजारमा देखिने विकृति, कृत्रिम मूल्यवृद्धि, व्यापारिक अनियमितता र उपभोक्ता ठगी नियन्त्रणका लागि अनुगमनलाई निरन्तरता दिइएको छ। ‘बजारलाई व्यवस्थित बनाउने र उपभोक्ताले गुणस्तरीय वस्तु तथा सेवा उचित मूल्यमा प्राप्त गर्ने वातावरण तयार गर्नु हाम्रो प्राथमिकता हो। त्यसैले नियमित रूपमा अनुगमन टोली परिचालन गरिरहेका छौँ,’ महानिर्देशक शाक्यले भने।

विभागले अनुगमनलाई खाद्यान्न तथा दैनिक उपभोग्य वस्तुको कारोबारमा मात्र सीमित नराखी उपभोक्तासँग प्रत्यक्ष सरोकार राख्ने विभिन्न व्यापारिक क्षेत्रसम्म विस्तार गरेको छ। खाद्यान्न तथा किराना पसल, होटल तथा रेष्टुरेन्ट, चमेनागृह, ग्यास स्टोर, रेडिमेड तथा थान कपडा पसल, कस्मेटिक, अटो पाट्र्स, तरकारी तथा फलफूल पसललगायत क्षेत्रमा विभागले निगरानी बढाएको छ। विशेषगरी दैनिक उपभोग्य वस्तुको मूल्य, गुणस्तर, बिक्रीवितरणको अवस्था, व्यवसाय सञ्चालनसम्बन्धी मापदण्ड तथा उपभोक्ताको अधिकारविपरीत हुने गतिविधिलाई अनुगमनको प्राथमिकतामा राखिएको विभागले जनाएको छ।

अनुगमनका क्रममा कैफियत देखिएका ७६ वटा फर्मलाई आवश्यक कागजातसहित उपस्थित हुन निर्देशन दिइएको छ। यसले बजार अनुगमनका क्रममा तत्काल कारबाहीमा परेका व्यवसायीसँगै थप छानबिन र नियामकीय निगरानीको दायरामा रहेका फर्मको संख्या पनि उल्लेख्य रहेको देखाउँछ।

अनुगमनलाई थप प्रभावकारी बनाउने तयारी
बजारमा हुने अनियमितता नियन्त्रण गर्न सरकारी निकायको अनुगमन मात्र पर्याप्त नहुने भन्दै विभागले उपभोक्ता तथा सर्वसाधारणको सहयोगसमेत अपेक्षा गरेको छ। महानिर्देशक शाक्यले बजारमा ठगी, अनुचित व्यापारिक गतिविधि वा उपभोक्ताको हितविपरीतका काम भएको पाइएमा त्यसबारे जानकारी गराउन सर्वसाधारणलाई आग्रह गरेका छन्। विभागले आवश्यकताअनुसार अनुगमन टोलीको सङ्ख्या र परिचालनलाई थप प्रभावकारी बनाउँदै लैजाने जनाएको छ।