नेपाल इन्फ्रास्ट्रक्चर बैंकको नाफा घट्यो, अधिकांश सूचकमा गिरावट

काठमाडौं – नेपाल इन्फास्ट्रक्चर बैंक (निफ्रा)ले चालु आर्थिक वर्ष २०८२/८३ को तेस्रो त्रैमाससम्ममा नाफा घटेको वित्तीय विवरण सार्वजनिक गरेको छ। चैत मसान्तसम्म बैंकले ६४ करोड ३३ लाख रुपैयाँ खुद नाफा कमाएको छ। जुन, अघिल्लो वर्षको सोही अवधिको तुलनामा करिब २८.५३ प्रतिशतले कम हो। गत वर्षको यसै अवधिमा यस्तो नाफा ९० करोड रुपैयाँ कमाएको थियो।

बैंकको खुद ब्याज आम्दानी २७ प्रतिशतभन्दा बढीले घटेको छ। चालु आवमा तेस्रो त्रैमाससम्म खुद ब्याज आम्दानी १ अर्ब ८ करोड रुपैयाँमा सीमित भएको छ। यस्तै, कुल सञ्चालन आम्दानी पनि २६.२० प्रतिशतले घटेको छ। सञ्चालन नाफा समेत घटेर ९२ करोड २ हजार रुपैयाँमा झरेको छ।

समिक्षा अवधिमा बैंकको कर्जा विस्तार भने उल्लेख्य रूपमा बढेको छ। चैत मसान्तसम्म ऋण विस्तार १६.५१ प्रतिशतले वृद्धि भई २८ अर्ब ५४ करोड रुपैयाँ पुगेको छ। निक्षेप भने सामान्य ०.२३ प्रतिशतले मात्र बढेको देखिन्छ। प्रतिशेयर आम्दानी घटेर ३ रुपैयाँ ९७ पैसामा छ। नेटवर्थ प्रति शेयर ११५ रुपैयाँ ८४ पैसा कायम भएको छ।

हाल २१ अर्ब ६० करोड रुपैयाँ चुक्ता पूँजी रहेको बैंकको जगेडा कोषमा ३ अर्ब ४२ करोड रुपैयाँभन्दा बढी सञ्चित छ। बैंकले सो अवधिसम्म ७ अर्ब ८० करोड रुपैयाँभन्दा बढी निक्षेप संकलन गर्दै २८ अर्ब ५४ करोड रुपैयाँभन्दा बढी कर्जा प्रवाह गरेको जनाएको छ।