तेस्रो बैंकिङ्ग डिस्कोर्शः उद्घाटन सत्रमा बैंकर्स संघका अध्यक्ष सन्तोष कोइराला सहभागी हुने 

काठमाडौं – तेस्रो बैंकिङ्ग डिस्कोर्श २०२५ को उद्घाटन सत्रमा नेपाल बैंकर्स संघका अध्यक्ष सन्तोष कोइराला सहभागी हुने भएका छन् । बैंकिङ्ग समाचार डटकमको आयोजनामा आगामी जेठ २२ गते हुने तेस्रो बैंकिङ्ग डिस्कोर्शमा अध्यक्ष कोइराला सहभागी हुने भएका हुन् । 

भोजपुरको भोजपुर नगरपालिकामा जन्मे हुर्केका कोइरालाले झापाको चन्द्रगढी–६ स्थित वीरेन्द्र माविबाट २०४५ सालमा एसएलसी उत्तीर्ण गरेका हुन् । सानैदेखि इन्जिनियरमा रुचि राख्ने गर्थे । तर, उनले इन्जिनियर बन्ने लक्ष्य भेट्टाउन नसकेपछि झापा नै फर्किएर मेची बहुमुखी क्याम्पसबाट बिकम पढे । त्रिभुवन विश्वविद्यालय अन्तर्गतको प्राइभेटबाट एमबीए गरेका छन् । उनले बैंक अफ काठमाण्डुबाट बैंकिङ्ग करिअर सुरु गरेका हुन् । उनीसँग सानिमा बैंकमा १३ वर्ष काम गरेको अनुभव छ । 

त्यसपछि उनी माछापुच्छ्रे बैंक प्रवेश गरे । माछापुच्छ्रे बैंकमा कोइरालाले ११ वर्ष बिताइसकेका छन् । सिनियर म्यानेजरबाट माछापुच्छ्रे बैंक प्रवेश गरेका कोइराला एजीएम, डीजीएम हुँदै २ वर्ष डिसीईओ बनिसकेका छन् । त्यसपछि उनी माछापुच्छ्रे बैंकमा सीईओ बनेका हुन् । उनी हाल दोस्रो कार्यकालको सीईओमा छन् । उनले पहिलो कार्यकाल सफल सीईओको रुपमा पूरा गरिसकेका छन् । उनले यतिबेला नेपाल बैंकर्स संघको नेतृत्व समेत संगालिरहेका छन् ।

डिस्कोर्शको उद्घाटन अर्थमन्त्री विष्णु प्रसाद पौडेलले गर्नेछन् । उद्घाटन सत्रमा अर्थमन्त्री विष्णु पौडेल, कोइरालासहित राष्ट्र बैंक, निजी क्षेत्र र वाणिज्य तथा विकास बैंकका नेतृत्वदायी भूमिकामा रहेका व्यक्तित्वहरूको समेत उपस्थिति रहने छ ।कार्यक्रममा उद्घाटन सत्रसहित चार वटा ‘प्यानल डिस्कसन’ र एउटा विशेष सत्र रहनेछ ।

‘नेपालमा कर्जा विस्तारको चुनौती: लक्षित उपायहरूको प्रयोग, क्षेत्रगत अनुकूलन र अन्य सम्भावनाहरू’ र ‘साना तथा मझौला उद्यमहरूमा कर्जा विस्तारको समस्या: समाधानका नवीन तथा प्रचलित अभ्यास र हाम्रो तयारी’ नामक पहिलो र दोस्रो सत्र छन। यस्तै, तेस्रो सत्रमा ‘ओपन बैंकिङ्ग र फिनटेकः सहकार्य, प्रतिस्पर्धा र नेपालमा नियो–बैंकको नियामकीय अवधारणा’ र ‘मौद्रिक नीति: आर्थिक शिथिलताको चक्र तोड्न वित्त नीति र मौद्रिक नीतिको रणनीतिक साझेदारी’ नामक अन्तिम सत्र हुनेछ ।

यसबाहेक, पूर्व अर्थमन्त्री डा.प्रकाश शरण महतसँग ‘विशेष सत्र’ हुनेछ । डिस्कोर्शको मुख्य प्रायोजककारुपमा ग्लोबल आईएमई बैंक रहेको छ । यस्तै, इभेन्ट पार्टनरमा ‘इसेवा’ रहेको छ भने रेमिट्यान्स पार्टनरमा ‘माइपे रेमिट्यान्स’ र इन्टरनेट पार्टनरमा डिसहोम रहेको छ । यसैगरी, ‘सर्पोटेडबाइ’मा नबिल बैंक, एससीटी, महालक्ष्मी विकास बैंक, वाणिज्य बैंक, कृषि विकास बैंक र इन्भेष्टमेन्ट मेगा बैंकसहित अन्य विभिन्न बैंक तथा वित्तीय संस्था र फिनटेक कम्पनीहरू समेत रहेका छन् ।