करोडौँ बक्यौता नतिरेपछि प्राधिकरणले दुई उद्योगको लाइन काट्यो

 काठमाडौं – नेपाल विद्युत प्राधिकरणले बुधबारदेखि थप दुई वटा उद्योगको लाइन काटेको छ। बक्यौता नतिरेको भन्दै बुधबार रातिदेखि जगदम्बा सिन्थेटिक र हुलास स्टिलको लाइन काटेको हो।

प्राधिकरणका अनुसार जगदम्बा सिन्थेटिक्सको १६ करोड ४ लाख रुपैयाँ र हुलास स्टिलको ११ करोड २९ लाख रुपैयाँ बक्यौता छ। प्राधिकरणले २०७२ माघदेखि २०७५ वैशाखसम्मको २५ प्रतिशत जरिवानासहित बक्यौता १५ दिनभित्र भुक्तानी गर्न उद्योगहरूमा बिल पठाएको थियो।

यसअघि मंगलबार राति प्राधिकरणले रिलायन्स स्पेनिङ मिल्स, घोराही सिमेन्ट र अर्घाखाँची सिमेन्टको लाइन पनि काटेको थियो।