चितवन- हरेक बर्ष जस्तै यो बर्ष पनि प्रमे दिवस लक्षित सौराहा फुड फेष्टिवल पर्यटकीय नगरी सौराहामा सुरु भएको छ ।प्रणय दिवस (प्रेस दिवस) लक्षित १८औं सौराहा फूड फेस्टिबल रेष्टुरेण्ट एण्ड बार एशोसियसन नेपाल (रेवान) सौराहा चितवनको आयोजना सुरु भएको हो ।

१८ औँ संस्करणको फुड फेष्टिवलको सांसद हरि ढकालले उद्घाटन गरेका छन् । सो अबसरमा उनले सौराहाको पर्यटन विकासमा सरकारले ध्यान नदिएको दुखेसो गरे । सरकारले चितवनको विकासमा पूर्व र पश्चिम भन्दा पूर्वी चितवन क्षेत्र ओझेलमा परेको सांसद ढकालले स्पष्ट पारे ।

सांसद ढकालले सौराहाको पर्यटनलाई उद्योगको मान्यता र पर्यटन बोर्डको कार्यालय स्थापनाका लागि आफूले एक बर्षदेखि प्रयास गरिरहेको बताए । उनले राज्य सौराहाप्रति जिम्मेवार नभएको बताए । कार्यक्रमान बागमती प्रदेशका पूर्वमन्त्री तथा सांसद कृष्णप्रसाद खनालले निकुञ्ज ऐन लामो समय देखि परिमार्जन हुन नसक्दा निकुञ्ज र मानिस बीच अविश्वासको खाडल बढ्दै गएको बताए ।

रत्ननगर नगरपालिकाका मेयर प्रलाद सापकोटाले मुलुकको तेस्रो पर्यटकीय नगरी सौराहा निकुञ्ज ऐनको चपेटामा परेको बताए । रेवानका केन्द्रीय उपाध्यक्ष संघर्ष विष्टले रेष्टुरेण्ट व्यवसायलाई पनि उद्योगको मान्यता दिन सरकारसंग माग गरे । क्षेत्रीय होटल संघ सौराहाका अध्यक्ष गंगा गिरीले सौराहाको पर्यटन पुरानै अबस्थामा फर्किने क्रममा रहेको भन्दै चालू आबमा मात्र २ लाख २५ हजार पर्यटन चितवन भित्रिएको जानकारी दिए ।

उद्घाटन कार्यक्रममा फेस्टिवलका कार्यक्रम संयोजक सुर्यबहादुर रिमालले स्वागत मन्तव्य राख्दै फेस्टिबलले सौराहा क्षेत्रलाई लाईट लाईफमा रुपान्तरण गरेको स्पष्ट पारे । लायन्स डेन क्बल नजिकको बसबार्क जाने सडकको दक्षित तर्फको खाली जमिनमा सुरु भएको फेस्टिबल फागुन तीन गते सम्म चल्ने रेवान सौराहाका अध्यक्ष ध्रुव गिरीले जानकारी दिए ।

सौराहा सहित चितवनको पर्यटन विकासको लागि फेस्टिबल चितवन व्राण्ड बनेको अध्यक्ष गिरीले बताए । खाना, संगित र संस्कृतिलाई संगसंगै अगाडि बढाएर फेस्टिवललाई विशेष बनाइएको छ । सौराहाको पर्यटनलाई पुरानै अवस्थामा फर्काउने गरि फेस्टिवलका गतिविधिलाई अगाडि बढाइएको छ।

समग्र सौराहाको पर्यटन विकास गर्ने, विभिन्न जातजातीका परम्परागत तथा स्थानीय, स्वदेशी, विदेशी खानाको प्रवर्द्धन गर्ने, स्थानीय कलासँस्कृति, भेषभुषाको जगेर्ना गर्दै पर्यटकीय गन्तव्यको रुपमा सौराहालाई राष्ट्रिय तथा अन्तराष्ट्रिय स्तरमा पहिचान गराउने, उज्यालो सौराहालाई निरन्तरता दिइने, प्रवेश टिकटबाट भएको आम्दानीले सौराहा पर्यटन मार्ग सौन्दर्यकरण गर्ने उद्देश्यले फेस्टिबल आयोजना गरिएको रेवानका महासचिव नविन नेपालले जानकारी दिए ।

फेस्टिबलमा विभिन्न जातजातीहरुको झाँकी प्रदर्शनी, राष्ट्रिय तथा स्थानीय कलाकार तथा दि एक्सीस ब्याण्डको साँगीतिक प्रस्तुती, स्थानीय जनजातीका खाना प्रदर्शनी तथा प्रतियोगिता, वेटर तथा वेटरेस बीच प्रतियोगिता, प्रणय दिवस विशेष कार्यक्रम, तान डोरी प्रतियोगिता, रेवान कप पालिका स्तरीय भलिवल प्रतियोगिता, अन्तर विद्यालय नृत्य प्रतियोगिता, सिन्धुलीको लोभलाग्दो कर्ने मगर बाजाको प्रस्तुती रहेकोे छ ।

दैनिक पाँच हजार पर्यटकले अबलोकन गर्ने उक्त फेस्टिबलमा ६० लाख अनुमानित खर्च हुने तथा तीन करोडको कारोबर हुने अनुमान गरिएको आर्थिक व्यवस्थापन समितिका संयोजक रामकुमार गुरौले जानकारी दिए । फेस्टिबललाई भब्य बनाउन पर्यटकीय नगरी सौराहालाई सिंगारिएको छ । फेस्टिवलमा ५० वटा खानाका स्टलहरु रहने छन् । फेस्टिबल उद्घघाटन पूर्व विहान सौराहामा भब्य शोभायात्रा निकालिएको थियो ।

रेवानका अध्यक्ष ध्रुव गिरीको अध्यक्षतामा भएको उद्घघाटन कार्यक्रममा प्रमुख जिल्ला अधिकारी भूपेन्द्र थापा, रेवानका संस्थापक अध्यक्ष बलराम दाहाल, रेवान महिला समुहकी अध्यक्ष लक्ष्मी विडारी लगायतले मन्तव्य राखेका थिए । रत्ननगर नगरपालिका संरक्षक रहेको सो फेस्टिबलको सहआयोजकमा रेवान महिला समूह, क्षेत्रीय होटल संघ नेपाल, चितवन, युनाईटेड हात्ती सञ्चालन सहकारी संस्था रहेका छन् ।