नागरिकको अपेक्षालाई केन्द्रबिन्दुमा राखेर कार्यसम्पादन गर्नुपर्छ: महानिरीक्षक कार्की 

काठमाडौं – प्रहरी महानिरीक्षक दान बहादुर कार्कीले परम्परागत पुलिसिङ भन्दा पनि नवीनतम सोच र कार्यशैली अपनाई नागरिकमैत्री, नागरिकप्रति उत्तरदायी एवम् प्रभावकारी र छिटोछरितो सेवा प्रवाह गर्नुपर्ने उल्लेख गर्दै नागरिकको अपेक्षालाई केन्द्रबिन्दुमा राखेर सबै प्रहरी कर्मचारीहरूले उत्कृष्ट कार्यसम्पादन गर्न निर्देशन दिएका छन्।  

हालै सरुवा भई आ–आफ्नो कार्यक्षेत्रमा जान लागेका प्रहरी उपरीक्षक तथा प्रहरी नायव उपरीक्षकहरूलाई सोमबार नेपाल प्रहरी प्रधान कार्यालयमा निर्देशन सम्बोधनको क्रममा उपलब्धिपूर्ण एवम् उत्कृष्ट कार्य सफलताको शुभकामना दिँदै कार्कीले उक्त निर्देशन दिएका हुन्। 

कार्कीले सबै प्रहरी कर्मचारीहरूले उच्च व्यावसायिकता प्रदर्शन गर्दै थप अनुशासित, निष्ठावान एवम् इमानदार हुनुपर्ने उल्लेख गर्दै उत्कृष्ट व्यवहार, बोलीबचनलाई आत्मसात् गरी संगठनको छवि वृद्धि हुने गरी आफूलाई प्राप्त जिम्मेवारी उत्कृष्ट ढंगले बहन गर्न निर्देशन दिए। संगठनले अख्तियार गरेका नीतिनियम तथा मापदण्ड अनुरूप कार्य गर्दै व्यक्तिगत स्वार्थ भन्दा पनि भातृत्वभाव एवम् सांगठनिक हितलाई केन्द्रबिन्दुमा राखेर कसैप्रति पूर्वाग्रह नराखी विभेदरहित एवम् कानुनसम्मत कार्य गर्न सरुवा भई कार्यक्षेत्रमा जान लागेका प्रहरी अधिकृतहरूलाई उनले निर्देशन दिए। 

कार्कीले आ–आफ्नो क्षेत्रको सम्भावित सुरक्षा चुनौतीहरूको पहिचान तथा विश्लेषण गरी आवश्यकता अनुरूप सुरक्षा योजना एवम् रणनीति अवलम्बन गर्दै योजनाबद्ध तवरले प्रभावकारी प्रहरी परिचालन गर्नुपर्ने बताए । महिला बालबालिका तथा ज्येष्ठ नागरिक, सीमान्तकृत वर्ग प्रति थप संवेदनशील हुनुपर्ने र आपत्रविपद् एवम् दु:ख पीडामा प्रहरी कार्यालयहरूमा आउने सेवाग्राहीहरूको समस्यालाई उचित सम्बोधन गर्नेतर्फ उनले विशेष जोड दिए।

प्रहरी कार्यालयबाट प्रवाह हुने सेवाहरूलाई प्रविधिमैत्री बनाउँदै लैजानु पर्ने उल्लेख गर्दै गुनासो तथा उजुरीको लागि क्यूआर कोडको प्रयोग तथा एसएमएस मार्फत भए गरेका प्रगतिहरू बारे जानकारी दिने व्यवस्था गर्नुपर्ने समेत उनले उल्लेख गरे। 

हिरासत कक्षलाई थप व्यवस्थित बनाउन विशेष ध्यान दिनुपर्ने, प्रमाणमुखी एवम् वस्तुनिष्ठ अपराध अनुसन्धानमा जोड दिँदै अपराध न्यूनीकरणमा सचेतना सँगसँगै नागरिकसँग सहकार्य गर्नुपर्ने, सीमा अपराध, तस्करी नियन्त्रण, फरार प्रतिवादी पक्राउलाई प्राथमिकतामा राख्नुपर्ने, दुर्घटना न्यूनीकरणमा थप सक्रिय हुनुपर्ने एवम् कनै पनि विपद्का घटनामा तत्काल खटिन सक्ने गरी पूर्व अभ्यासका साथ प्रहरी कर्मचारीहरू तयारी हालतमा रहनुपर्ने उनले बताए।