रोकिएको कृषि तथा पशु बीमाको अनुदान बक्यौता भुक्तानी हुँदै

काठमाडौं – निर्जीवन बीमा कम्पनीहरुले लामो समयदेखि अड्किएको कृषि तथा पशु बीमाको अनुदान बापतको  १ अर्ब ६८ लाख रुपैयाँ पाउने भएका छन् । बाली तथा पशुधन बीमा कोषको मंगलबार बसेको बैठकले १ अर्ब ६८ लाख रुपैयाँ निर्जीवन बीमा कम्पनीहरुलाई भुक्तानी गर्ने निर्णय गरेको हो ।

यो रकमले पशु बीमातर्फ गत आर्थिक वर्ष २०७९/८० का बाँकी बक्यौता सबै तिरिनेछ। चालु आर्थिक वर्षको भने असोजसम्मको मात्रै भुक्तानी हुनेछ। कात्तिकदेखि यताको भुक्तानी भने बाँकी रहने छ। कृषि बीमातर्फको अनुदान भने गत आर्थिक वर्षको बैशाखदेखिकै बाँकी छ ।

सरकारले कृषि तथा पशुबीमामा लाग्ने शुल्कमा ८० प्रतिशत अनुदान दिने गर्छ। साेही अनुसार कम्पनीले सम्बन्धित किसानबाट २० प्रतिशत मात्रै शुल्क उठाउँछन्। बाँकी पैसा सरकारले नै दिनुपर्ने प्रावधान छ।