एम्बुलेन्स तोडफोड गरेको आरोपमा तीनजना पक्राउ

काठमाडौं – सङ्ङ्खुवासभाको सभापोखरी गाउँपालिकामा पार्किङ गरेर राखिएको एम्बुलेन्स तोडफोड भएको छ। सभापोखरी गाउँपालिकाको एम्बुलेन्स तोडफोड गरेको आरोपमा प्रहरीले तीन जनालाई पक्राउ गरेको छ।

पक्राउ पर्नेमा सभापोखरी गाउँपालिका–६ का १८ वर्षीय युजेन राई, सभापोखरी- ५ का १९ वर्षीय सबिन लिम्बू र सभापोखरी–३ का १८ वर्षीय रविराज राई रहेका छन्।

असोज २४ गते शनिबार राति करिब १० बजे गाउँपालिकाको नम्बर प्लेट नभएको ‘अन टेस्ट’ एम्बुलेन्स पार्किङ गरेर राखिएको अवस्थामा तोडफोड गरिएको थियो। घटनामा लगत्तै फरार भएका तीनै जनालाई प्रहरीले आइतबार पक्राउ गरेर सोमबार सार्वजनिक गरेको हो।

प्रहरीले उनीहरूलाई पक्राउ गरी आपराधिक उपद्रव कसुरमा मुद्दा दर्ता गरेको जनाएको छ। असोज २६ गते सङ्खुवासभा जिल्ला अदालत चैनपुरबाट म्याद थप अनुमति लिएर घटनाबारे थप अनुसन्धान भइरहेको जिल्ला प्रहरी कार्यालयले जनाएको छ।