इन्स्योरेन्स डिस्कोर्शमा सिंगापुरका प्रोफेसर लिमले विशेष सम्बोधन गर्ने

काठमाडौं – तेस्रो इन्स्योरेन्स डिस्कोर्श २०२६ मा सिंगापुरका प्रोफेसर इयान लिमले विशेष सम्बोधन गर्ने भएका छन्। बैंकिङ्ग समाचार र न्यूज अफ इन्स्योरेन्सको संयुक्त आयोजनामा हुने तेस्रो संस्करणको नेशनल इन्स्योरेन्स डिस्कोर्शमा लिमले विशेष सम्बोधन गर्न लागेका हुन्।

लेक्सेसर फाइनान्सियल ग्रुपका संस्थापक तथा प्रमुख कार्यकारी अधिकृत समेत रहेका लिमसँग बीमा क्षेत्रमा काम गरेको तीन दशक लामो अनुभव छ। उनी सिंगापुर इन्स्योरेन्स कलेजमा सन् १९९८ देखि प्रोफेसरका रुपमा आवद्ध छन्।

इन्स्योरेन्स डिस्कोर्श यही वर्ष २०८२ को माघ ७ गते काठमाडौंको याक एण्ड यति होटलमा हुनेछ।कार्यक्रममा नियामकीय निकाय, बीमा कम्पनीहरु, बैंक तथा वित्तीय क्षेत्र, बीमा विज्ञ तथा अन्य क्षेत्रका व्यक्तित्वहरुको उपस्थिति रहने छ।

मुख्यरुपमा सो कार्यक्रममा बैंकासुरेन्सः नीति, नियामक र बजारको वास्तविकता, स्वास्थ्य सेवाको पहुँचः नेपालमा स्वास्थ्य बीमाको भविष्य, इन्सुरटेक नवप्रवर्तनः नेपालमा बीमालाई आवश्यकतासँगै जीवनशैलीमा परिणत गर्दै, भविष्यको मार्गचित्रः आधुनिक जीवनशैलीका लागि बीमा उद्योगको पुनर्संरचना र रूपान्तरण जस्ता विषयमा छलफल हुनेछ।

यस्तै, विशेष सत्रमा बीमाको अर्थशास्त नामक छलफल हुनेछ। जसमा योजना आयोगका उपाध्यक्ष डा.प्रकाश कुमार श्रेष्ठ उपस्थित हुनेछन्। गत वर्ष २०२३ र २०२५ मा पनि इन्स्योरेन्स डिस्कोर्श सम्पन्न गरिसकेको छ।